Integrimi/ Rama: Drita jeshile për mbylljen e negociatave vezullon në harkun e 180-vjetorit të lindjes së Naim Frashërit

25 Maj 2026, 08:36, Politikë CNA

Integrimi/ Rama: Drita jeshile për mbylljen e negociatave vezullon në

Kryeministri Edi Rama ka bërë një reagim lidhur me procesin e negociatave, ku shprehet se drita jeshile për çeljen e fazës mbyllëse të negociatave të anëtarësimit dhe mbajtja e Konferencës Ndërqeveritare Shqipëri-BE përkon me 180-vjetorin e lindjes së Naim Frashërit.

Në postimin e tij në rrjetet sociale, Rama e cilëson Naim Frashërin si “Shqipëribërësi” i madh dhe udhërrëfyesi i aspiratës shekullore të shqiptarëve drejt Europës.

Më tej shton se Shqipëria synon që në vitin 2030, në 130-vjetorin e ndarjes nga jeta të poetit kombëtar, të kurorëzojë rrugëtimin europian duke e shpallur atë “Viti Europian i Naimit”.

Referuar edhe fjalëve të personalitetit të letërsisë shqipe, Faik Konicës për përcjelljen e Naim Frashërit në ceremoninë mortore, u theksua se në Shqipërinë e vitit 2030 figura e poetit do të kremtohet nga një popull i tërë.

Postimi i plotë:

MIRËMËNGJES

Eshtë një mister i gëzueshëm, që drita jeshile për çeljen e fazës mbyllëse të negociatave të anëtarësimit në Bashkimin Europian dhe mbajtjen e Konferencës Ndërqeveritare Shqipëri-Bashkim Europian, të vezullojë në harkun e 180-vjetorit të lindjes së Naim Frashërit, udhërrëfyesit gjenial të aspiratës sonë shekullore drejt “Diellit që lind andej nga perëndon”.

Me mirënjohje të madhe e kujtojmë në këtë 25 maj “Shqipëribërësin” e madh dhe të pavdekshëm, duke e thirrur Orën e Mirë të shpirtit të tij për ditët e mira që paskëtaj vijnë për kombin e për shtetin tonë.

Me punën tonë të përbashkët, nën dritën e amanetit të tij dhe rilindësve tanë, e me ndihmën e Zotit Shqipëria 2030, do ta kurorëzojë atë vit të 130-vjetorit të vdekjes së Naim Frashërit si Vitin Europian të Naimit, vitin e “Diellit që lind andej nga perëndon.

Dhe nëse siç tha Konica, kur u shtie në dhe Naimin e përcollën 300 shqiptarë, në Shqipërinë 2030 Shqipëribërësin e madh do ta kremtojë të gjallë një popull i tërë, i bërë njësh me familjen e Europës së Bashkuar. /CNA