web counter
LEXO PA REKLAMA!

SHKARKO APP

App Store
Google Play

E fundit!

x

Impiantet e trajtimit të ujërave të zeza/ Zhupa: Qeveria është duke "masakruar" me gjoba bizneset turistike

17 Korrik 2024, 10:35, Politikë CNA
Impiantet e trajtimit të ujërave të zeza/ Zhupa: Qeveria
Ina Zhupa, deputete e PD-së

Deputetja demokrate, Ina Zhupa, në një deklaratë për mediat deklaroi se PD u bashkohet shoqatave të turizmit për t’i kërkuar qeverisë heqjen dorë nga gjobat për një akt të paligjshëm, në lidhje me impiantet e trajtimit të ujërave të zeza. 

Zhupa nënvizoi se qeveria është duke "masakruar" me gjoba bizneset turistike në mënyrë abuzive.

"Ne u kërkojmë dy ministreve, Balluku dhe Kumbaro, që Task-Forca e tyre duhet të klasifikojë mirë kush janë subjektet për të cilat duhet të veprojë ky akt normativ dhe më pas të veprojë. Ato duhet të ndryshojnë udhëzimin e tyre që e kanë bërë duke pasur qëllim të favorizojnë ata që shesin impiante dhe jo të trajtojnë ujërat e zeza", u shpreh Zhupa. 

Deklarata e plotë: 

Qeveria ndërkohë që bën propagandë të madhe me turizmin, është duke masakruar me gjoba bizneset turistike në mënyrë abuzive.

Është e paprecedent se si biznese në fushën e hotelerisë, që zhvillojnë aktivitetin buzë detit, lumenjve apo liqeneve, që kanë lidhje të rregullt kontrate me Ujësjellës Kanalizime për ujërat e zeza, ngopen me gjoba nga një Task-Forcë.

Me aktin normativ nr. 8, 28-12-2023 për menaxhimin e ujërave të ndotura, është ngritur një Task-Forcë nga ministret Balluku-Kumbaro që qëllimin e vet në letër e ka pozitiv për menaxhimin e ujërave të ndotura, kurse në praktikë gjobit biznese që nuk ndotin dhe kanë kanalizime në ujërat e zeza dhe kontrata të rregullta me UK.

Kjo Task-Forcë nuk shikon a i hedhin këto ujëra të ndotura në burimet ujore, por shikon a kanë blerë impiantin që ka vendosur shteti që kushton nga 20-100 mijë euro në varësi të madhësisë.

U vendosen gjoba bizneseve nga 15 milionë në 30 milionë lekë dhe këto gjoba janë vendosur si titujt ekzekutivë për të cilat vetëm në gjykatë mund të ankohesh. Mosblerja e impianteve që kërkon qeveria dhe ka paracaktuar qeveria të çon deri në humbjen e licencës së aktivitetit. Gjobat e bizneseve turistike që kanë kontrata të rregullta me shtetin dhe metoda të ligjshme të trajtimit të ujërave të ndotura janë zhvatje, janë paligjshmëri.

Këto gjoba vihen në bazë të një udhëzimi Nr 1, datë 01/02/2024 që nuk njeh më diferenca mes bizneseve që i trajtojnë ujërat e zeza me ato që si trajtojnë, por i detyron të gjitha të vendosin këto impiante.

Partia Demokratike i bashkohet thirrjes së shoqatave të turizmit për të kërkuar heqjen dorë nga gjobat e një akti të paligjshëm mbi subjektet që janë të lidhur në kolektorin kryesor të UK dhe kanë kontratë të rregullt me UK.

Ne u kërkojmë dy ministreve, Balluku dhe Kumbaro, që Task-Forca e tyre duhet të klasifikojë mirë kush janë subjektet për të cilat duhet të veprojë ky akt normativ dhe më pas të veprojë. Ato duhet të ndryshojnë udhëzimin e tyre që e kanë bërë duke pasur qëllim të favorizojnë ata që shesin impiante dhe jo të trajtojnë ujërat e zeza.

Mbështesim çdo veprim në mbrojtje të mjedisit, por kundërshtojmë me forcë këto gjobëvënie biznesit të ndershëm që nuk ndot, por goditet për të mbushur arkën e shtetit dhe xhepat e klientëve të paracaktuar për impiante./CNA 





Lajmet e fundit nga