“Plas” tek Rilindja/ Ministri i Drejtësisë, kundër Enveristit të fundit

16 Korrik 2024, 19:49, Politikë CNA

“Plas” tek Rilindja/ Ministri i Drejtësisë, kundër

Fotomontazh - Ulsi Manja dhe Fatmir Xhafaj

Ditën e djeshme u zhvillua seanca parlamentare, por të gjithë vëmendjen e morën pyetjet ndaj kreut të SPAK-ut, Altin Dumani dhe përgjigjet e tij.

Pas raportimit të Dumanit ndjekja e punimeve parlamentare ka qenë e ulët, por ajo që ka rënë në sy është qëndrimi i ministrit të Drejtësisë, Ulsi Manja, kundër Fatmir Xhafajt.

Altin Dumani, kreu i SPAK-ut në Kuvend. Burimi, LSA

Xhafaj, i njohur si enveristi i fundit, sulmoi SPAK-un dhe kërkoi hapur të goditet ky institucion drejtësie me reforma. (Lexo këtu)

"Drejtësia penale nuk mund të jetë çështje numrash dhe as garë statistikash brenda sistemit. Drejtësia nuk gjykon dhe as ndëshkon bazuar mbi perceptim, as mbi preferenca politike, as mbi shijet e portaleve mediatike, të ndikuara po prej tyre, por mbi fakte dhe prova. Populizmi politik është i dëmshëm, por populizmi gjyqësor është edhe më i dëmshëm. Dua t’u kujtoj përgjegjësinë që Kuvendi ka për të reflektuar mbi problematikat dhe për të propozuar zgjidhje, jo përmes tavolinave hermetike, por përmes një procesi gjithëpërfshirës, transparent dhe profesional që në qendër të këtij debati të jenë vetë njerëzit e drejtësisë”, tha Xhafaj.

Por nga ana tjetër, ministri i Drejtësisë, Ulsi Manja ka dalë kundër kolegut të tij dhe ish-ministrit të Brendshëm, Fatmir Xhafaj, duke mbështetur SPAK-un pa rezerva. (Lexo këtu)

Ministri i Drejtësisë, Ulsi Manja. Burimi, LSA

Manja ka rrëzuar tezat e Xhafajt dhe të disa individëve të Xhafajt brenda mazhorancës se SPAK-u po godet me statistika, pa fakte dhe pa prova.

“SPAK-u, sot me rezultatet dhe rekordet që ka, në luftën kundër korrupsionit dhe krimit të organizuar, është një model që do duhet të shtrihet edhe në pjesën tjetër të sistemit të drejtësisë, sepse drejtësia do duhet parë 360 gradë dhe mentaliteti, kultura, korrektësia në zbatimin e ligjit, që sot, ajo trupë prokurorësh dhe hetuesish kanë ngjallur shpresë për shqiptarët do të duhet të shtrihet mbi gjithë pjesën tjetër të sistemit”, deklaroi ndër të tjera ministri i Drejtësisë.

Në fakt, deri tani statistikat e raportuara edhe nga vetë Dumani tregojnë se SPAK-u ka minimumin e personave të arrestuar dhe të gjitha faktet, provat dhe vendimet e marra për arrestimet janë me vendim gjykate, pra që rrëzojnë çdo pretendim të enveristit të fundit dhe të grupit të të pakënaqurve.