"I plagosuri, punonjës i AMP nën varësinë e ministres"/ Këlliçi: Koçiu të japë dorëheqjen, mohimi nuk është zgjidhje

11 Nëntor 2025, 18:55, Politikë CNA

"I plagosuri, punonjës i AMP nën varësinë e

Deputeti i Partisë Demokratike Belind Këlliçi ka reaguar lidhur me atentatin mafioz që i mori jetën krahut të djathtë të Emiljano Shullazit dhe la të plagosur shoferin e tij.

Këlliçi ka hedhur akuza në drejtim të ministres së Brendshme Albana Koçiu, e cila ditën e sotme deklaroi se Shqipëria tashmë është vend i sigurt, teksa ishte duke raportuar në Komisionin e Punëve të Brendshme dhe të Mbrojtjes.

Deputeti shkruan se deklaratat e ministres dhe ngjarjet e sotme kriminale janë një paradoks. Këlliçi liston ngjarjet e fundit kriminale dhe shkon më tej kur deklaron se Koçiu duhet të kishte dhënë tashmë dorëheqjen dhe jo të mohojë realitetin.

"Gjendja e mohimit dhe siguria në kolaps!

Nuk kanë kaluar as 8 orë nga raportimi i Ministres së Brendshme, Albana Koçiu, në Komisionin e Punëve të Brendshme dhe të Mbrojtjes në Kuvend.

Në deklarimet e saj, ministrja demonstroi se ndodhej institucionalisht në gjendjen e mohimit të situatës së rënduar kriminale në vend.

Ajo tha se “policia nuk rri dot në kuzhinë për të parandaluar që djali të godasë me thikë babanë, apo brenda në kuzhinën e restorantit për të parandaluar picerin të godasë më thikë kuzhinierin”.

Më tej, ministrja u zgjat mbi një orë duke folur mbi monopatinat dhe rrezikshmërinë e tyre.

Në një paradoks makabër, në të njëjtën ditë pak orë më pas ndodhi ngjarja e rëndë e Rinasit e cila jo vetëm ka tronditur opinionin publik, por ka ngritur edhe pikëpyetje serioze sa i takon sigurisë kombëtare në aeroportin e vendit, si dhe integritetit të strukturës policore, duke marrë parasysh se një ndër viktimat e atentatit është punonjës i AMP-së, nën varësinë e Ministres së Brendshme!

Në kontekstin e një ndjenje të thellë pasigurie tek qytetarët, kriminalizimi të policisë në çdo nivel, infiltrimi të strukturave kriminale në kupolën e institucioneve ligjzbatuese, nuk është gjëndja e mohimit zgjidhja për problemet e rënda të sigurisë dhe as loja me figurinat, duke ndërruar shpesh fytyrën e Ministrit të Brendshëm por jo substancën, mënyrën e të konceptuarit të punës.

Një ministri që ndjek parimin e tmerrshëm kryeministror “të hanë kokat e njëri tjetrit”, nuk i ofron dot kurrë shqiptarëve sigurinë që meritojnë.

Ministrja e Brendshme duhej të kishte dhënë tashmë dorëheqjen. Çdo orë e saj në detyrë, është një rrezik më shumë për jetën dhe sigurinë e qytetarëve", shkruan Këlliçi./CNA