E fundit!

08:42 Politikë

Mblidhet sot Këshilli Kombëtar i PD-së/ Pritet zgjedhja e Sekretarit të Përgjithshëm, nënkryetarëve dhe strukturave

Partia Demokratike vijon procesin e riorganizimit të brend...

Asambleja e Bashkive të Shqipërisë/ Kryebashkiaku i Kavajës, Qosja sqaron pjesëmarrjen

11 Nëntor 2025, 13:29, Politikë CNA

Asambleja e Bashkive të Shqipërisë/ Kryebashkiaku i Kavajës,

Presidenti i Shoqatës së Bashkive dhe të Zgjedhurve Vendorë, Fisnik Qosja, ka bërë një njoftim për shtyp në lidhje me pjesëmarrjen e tij në Asamblenë e Përgjithshme të Shoqatës Kombëtare të Bashkive të Shqipërisë.

Asamble ku u vendos shkarkimi i Erion Veliajt, i cili e mbante postin e kryetarit të shoqatës.

Qosja thotë se pjesëmarrja ka qenë në cilësinë e presidentit të shoqatës në kuadër të një bashkëpunimi me organizata të të zgjedhurve vendorë.

Kryebashkiaku i Kavajës thotë se kur bëhet fjalë për interesat e vendit, ndasitë politike lihen mënjanë.

Reagim ky i ardhur pas disa informacioneve të përhapura në lidhje me bashkëpunimin e shoqatës me kryebashkiakët socialistë.

Njoftim për shtyp

Në cilësinë e Presidentit të Shoqatës së Bashkive dhe të Zgjedhurve Vendorë, si dhe drejtues i forumit më të lartë të të zgjedhurve vendorë të partive opozitare, dëshiroj të sqaroj publikisht disa informacione të përhapura në disa media dhe rrjete sociale, që lidhen me bashkëpunimin me Shoqatën Kombëtare të Bashkive, ku aderojnë kolegët e mbështetur nga Partia Socialiste dhe partitë e mazhorancës.

Pjesëmarrja ime në Asamblenë e mbajtur më 20 shtator u bë ekskluzivisht në cilësinë time si President i Shoqatës së Bashkive dhe të Zgjedhurve Vendorë, në kuadër të një praktike normale bashkëpunimi dhe koordinimi vjetor ndërmjet dy organizatave përfaqësuese të të zgjedhurve vendorë. Qëllimi i këtij takimi ishte diskutimi mbi problematikat që lidhen me pushtetin vendor në Shqipëri dhe, mbi të gjitha, dërgimi i një mesazhi të qartë për partnerët tanë ndërkombëtarë Komisionin Europian, Këshillin e Europës, Kongresi i Autoriteteve Lokale dhe Rajonale, se kur bëhet fjalë për interesat strategjike të vendit dhe integrimin, i lënë mënjanë ndasitë politike për të bashkëpunuar në funksion të së mirës së përbashkët. Kështu kemi bërë dhe kështu do të vazhdojmë të bëjmë gjithmonë.

Duke thënë këtë, dëshiroj të theksoj se, përtej këtij bashkëpunimi korrekt dhe institucional, nuk ka ndodhur asnjë bashkim apo përfshirje në strukturat e njëra-tjetrës.

Shoqata që unë drejtoj i qëndron plotësisht besnike vendimeve të Asamblesë, e cila përcakton qartë se ne do të bashkëpunojmë me kolegët tanë, organizatat e tjera dhe institucionet shtetërore vetëm në funksion të interesit publik dhe konsolidimit të autonomisë vendore, duke ruajtur të paprekur identitetin dhe misionin e Shoqatës që përfaqëson ekskluzivisht bashkitë dhe këshilltarët e zgjedhur vendorë nga radhët e opozitës./CNA