E fundit!

15:31 Qyteti im

“Atdheu mbi të gjitha”/ Koncerti që bashkoi artistët dhe publikun në Pogradec

Përpara qindra qytetarëve dhe turistëve, në sheshin “Odeon...

Grigels Muçollari: Tirana, ndër qytetet më të ndotura në Evropë, shkaktohen sëmundje te fëmijët

22 Mars 2024, 11:22, Politikë CNA

Grigels Muçollari

Anëtari i kryesisë së Partisë Demokratike, Grigels Muçollari, u shpreh në një deklaratë për mediat duke iu referuar OBSH-së se Tirana është ndër qytetet më të ndotura në Evropë.

Ai theksoi në fjalën e tij se grimcat e rrezikshme janë 2.5 herë më të larta dhe përgjegjëse për një sërë sëmundjesh te fëmijët.

Deklarata e plotë:

Një tjetër alarm për gjendjen katastrofale të ajrit në Tiranë dhe në Shqipëri, vjen nga matjet e sapopublikuara të Organizatës zvicerane IQAir. Ajo konstaton se në vendin tonë përqendrimi i grimcave të dëmshme në ajër është 3 herë më i lartë se norma që sugjeron OBSH.

Me gjithë shqetësimet e ngritura në mënyrë të përsëritur, qeveria dhe autoritetet shqiptare nuk kanë bërë asgjë.

Rezultati është ky që shohim e thithim përditë në ajër dhe që nga viti në vit ka përkeqësim. E tregon dhe tabela.

Në vitin 2021 niveli i grimcave të rrezikshme ishte 12,5 mikrogramë, pra 2.5 herë më e lartë. Një vit më vonë rritet edhe më shumë, duke kapur 14.5. Dhe vijmë te matja e fundit për vitin 2023, me 16.7, ku tejkalohet me 3 herë kufiri i vendosur nga Organizata Botërore e Shëndetësisë.

Krejt ndryshe është, për shembull, Kroacia, ku sipas këtij raporti, niveli i ndotjes është reduktuar me 40 për qind.

PM2.5, siç emërtohet përqendrimi i këtyre grimcave, është përgjegjës për shume sëmundje, si astma, kanceri, goditjet në tru, prekja e mushkërive dhe ndikon edhe në zhvillimin e fëmijëve.

Shëndeti, cilësia e jetës dhe ajri që thithin qytetarët, nuk janë prioritet për qeverinë e për kryebashkiakun.

Për ta, pasurimi, privilegjet, vrapi pas parave, propaganda, janë shqetësimi kryesor.

Kam një pyetje për këdo që na ndjek. A keni sot një të afërm që vuan nga alergjitë, nga prekja e mushkërive, nga tumoret, apo fëmijë që shfaqin probleme me zhvillimin?

Ajri i ndotur, që ndotet çdo vit e më shumë, është një nga shkaqet kryesore. Po çfarë po bëjnë autoritetet për këtë. Asgjë, përkundrazi, po ndikojnë në përkeqësimin e situatës. Ju e shihni këtë te makineritë e rënda që janë shtuar, te betonieret, te ndërtimi në çdo skaj, te fabrikat qe nuk respektojnë standardet.

Duhet të kuptojmë se pse qeveritarët tanë nuk e kanë shqetësim ndotjen. Janë gjatë gjithë ditës ose në zyra luksoze, ose në makina po aq luksoze, ose në vilat e tyre milionëshe në periferi ose bregdet, ku ndotja është larg normave të kryeqytetit e të zonave me banim të dendur.

Shqipëria është sot vendi më i ndotur në Evropë dhe këtë nuk e shpëlan dot asnjë propagandë, asnjë samit, asnjë pemë që mbillet për publicitet dhe asnjë pyll orbital që nuk ekziston.

Qeveria dhe politikat e saj të mjedisit janë shkaktare të ndotjes dhe askush tjetër. Që të pastrohet ajri dhe mjedisi, duhet pastruar vendi nga kjo qeveri./CNA