Projekti i Portit të Durrësit/ Balluku: Nuk do të ndërtohet me PPP apo koncesion, aset kombëtar

21 Mars 2024, 13:23, Politikë CNA

Projekti i Portit të Durrësit/ Balluku: Nuk do të ndërtohet

Belinda Balluku

Ministrja e Infastrukturës dhe Energjisë, Belinda Balluku, në fjalën e saj në Kuvend dha detaje nga projekti për Portin e Durrësit.

"Sigurisht që Porti i Durrësit është një nga projektet më të mëdha, jo vetëm për Shqipërinë, por për të gjithë Ballkanin, pasi jeni në dijeni që porti i ri i Durrësit në Porto Romano nuk do t'i shërbejë vetëm Shqipërisë, por është i lidhur me dy porte të thata, me portin që do të ndërtohet në Strugë për t'i shërbyer Maqedonisë së Veriut dhe portin që do të ndërtohet në Prishtinë për t'i shërbyer Kosovës", u shpreh ministrja.

Ajo reagoi edhe ndaj akuzave të opozitës për këtë projekt ku nënvizoi se kemi të bëjmë me aset publik, i cili nuk mund të ndërtohet me PPP apo nuk mund t'u jepet me koncesion palëve të tjera.

"Ky investim është pjesë e angazhimit tonë si anëtarë të aleancës dhe është përgjegjësi e Republikës së Shqipërisë për të rritur përqindjen e investimeve në mbrojtje në raport me PBB e vendit. Në këtë këndvështrim kemi të bëjmë me aset publik, i cili nuk mund të ndërtohet me PPP apo nuk mund t'u jepet me koncesion palëve të tjera, pasi është një aset kombëtar i një rëndësie të veçantë, ashtu siç ka ndodhur edhe me asetet e tjera të infrastrukturës kritike. Nga ana tjetër me të vërtetë jemi të keqardhur, ndjehemi të shqetësuar që opozita përdor këtë projekt me strategji rajonale për ta kthyer në një kalë beteje pasi me të vërtetë këtu preket interesi kombëtar, preket interesi i të gjithë shqiptarëve dhe kjo nuk është një çështje për ta kthyer në një lojë politike", u shpreh Balluku.

Balluku sqaroi më tej se nuk bëhet fjalë për mbylljen e një porti dhe për hapjen e një porti tjetër, por këtu bëhet fjalë për dy porte.

"Ndërkohë për sa i përket zhvendosjes së Portit të Durrësit në zonën e Porto Romanos më lini që t’ju sqaroj pasi thoni që do ngelet Durrësi pa port, nuk i dihet nëse do të ndërtohet. Ky është projekti më transparent dhe më i detajuar që Republika e Shqipërisë ka bërë në historinë e pluralizmit pasi gjithçka, çdo hap nga studimi fizibilitetit tek projekti i detajuar dhe gjithçka tjetër janë bërë përmes garave ndërkombëtare. Këtu nuk bëhet fjalë për mbylljen e një porti dhe për hapjen e një porti tjetër, por këtu bëhet fjalë për dy porte. Një port turistik, që do të jetë ai që sot është porti tregtar dhe një port tregtar dhe militar në zonën e Porto Romanos", tha ajo.

Sipas Ballukut, kostot e portit të Porto Romanos janë 390 milionë euro, kjo kosto pa TVSH, të ardhura të parashikuara nga dy projekte portuale.

"Në Durrës janë 280 milionë euro të ardhura direkte nga marina e Durrësit si divident, ndërkohë që 1 miliard euro të ardhura nga tatimet, taksat dhe kontributet që sjell ky projekt, pra projekti i Marinës së Durrësit, pasi ka një keqinformim kur thoni që ka përjashtim nga taksat, pasi nuk ka asnjë përjashtim nga taksat, përveç taksës së infrastrukturës që ka qenë pjesë e negocimit dhe e marrëveshjes. Për të gjitha taksat e tjera sigurisht do të performojë ashtu siç parashikon ligji fiskal në Republikën e Shqipërisë", tha ajo./CNA