web counter
LEXO PA REKLAMA!

SHKARKO APP

App Store
Google Play

E fundit!

x

Fatmir Mediu në OSBE: Krimi i organizuar dhe korrupsioni, faktorë kyç për destabilitet në Shqipëri

1 Korrik 2024, 09:10, Politikë CNA
Fatmir Mediu në OSBE: Krimi i organizuar dhe korrupsioni, faktorë
Fatmir Mediu, foto: LSA

Në një nga seancat e debateve për sigurinë e Evropës që po zhvillohen në Sesionin Vjetor të Asamblesë Parlamentare të OSBE-së në Bukuresht, kryetari i Partisë Republikane, Fatmir Mediu, ngriti si shqetësim rrezikun që i vjen Ballkanit nga krimi i organizuar dhe korrupsioni.

Mediu theksoi se stabiliteti në Shqipëri dhe Ballkan ka edhe dy armiq të tjerë të mëdhenj, krimin e organizuar dhe korrupsionin, që e kanë bazën te goditja e zgjedhjeve të lira e të ndershme.

“Ne, në vendet tona, duhet të sigurojmë demokracinë, bazuar në zgjedhje të lira e të ndershme. Dhe është pikërisht aty ku nis krimi i organizuar, me blerjen e votave me intimidimin e votuesve, pa zgjedhje të lira e të ndershme", u shpreh zoti Mediu.

Më tej ai i kërkoi organizatës të ketë më shumë vëmendje për rajonin e Ballkanit, veçanërisht për standardet e zgjedhjeve.

“Duke qenë se OSBE qëndron për zgjedhje të lira e të ndershme, do të kërkoja më shumë vëmendje për rajonin, për standardet e zgjedhjeve, respektimin e të drejtave dhe liritë e qytetarëve tanë, sepse kjo është, gjithashtu, shumë, shumë shqetësuese dhe një kërcënim shumë i madh për stabilitetin tonë në rajon", tha zoti Mediu në fjalën e tij në Sesionin Vjetor të OSBE-së që po mbahet në Bukuresht. 

Duke ndarë të njëjtin shqetësim me përfaqësuesit e tjerë për luftën hibride në Moldavi dhe Gjeorgji, Mediu kërkoi vëmendjen e OSBE-së për Ballkanin, të cilin e quan si një pikë tjetër potenciale për konflikt përmes qeverive proxy, të deleguara apo në lidhje me Rusinë dhe Kinën.

Ai përmendi rrezikun e ndarjes së Bosnjës, ndarjet fetare dhe politike në Mal të Zi apo konfliktin në Veriun e Kosovës, si disa shembuj konkretë të ndërhyrjes së jashtme si përpjekje për destabilitet./CNA 

 





Lajmet e fundit nga