web counter
LEXO PA REKLAMA!

SHKARKO APP

App Store
Google Play

E fundit!

x

“Çështje alarmante kombëtare dhe rajonale”/ Vokshi: Shqipëria po rrëshqet me shpejtësi drejt autokracisë

17 Tetor 2025, 15:51, Politikë CNA

“Çështje alarmante kombëtare dhe rajonale”/ Vokshi:

Deputetja demokrate, Albana Vokshi, deklaroi sot se me qeverisjen e socialistëve, Shqipëria po rrëshqet me shpejtësi drejt autokracisë.

Në fjalën e saj në Asamblenë e PPE-së në Lituani, Vokshi u shpreh se gjendja paraqet edhe një çështje alarmante kombëtare dhe rajonale.

Vokshi tha se kjo situatë duhet ndalur sa më shpejt, përpara se vendi të humbasë edhe më shumë, qytetarët dhe demokracinë.

 “Siç e dini të gjithë, më 11 maj 2025 në Shqipëri u mbajtën zgjedhjet. Por çuditërisht, pas 5 muajsh ende nuk kemi raportin përfundimtar të ODIHR-it.
Është bërë publik një letër nga ministri i Jashtëm i Shqipërisë, dërguar drejtuesve të misioneve vëzhguese, ku ai u kërkon atyre të ndryshojnë raportin.
Gjithashtu dimë se ka pasur intimidime dhe kërcënime ndaj vëzhguesve për t’u hequr akreditimet, me qëllim që raporti paraprak të ndryshohej.

Ende po presim, pas 5 muajsh nga zgjedhjet, dhe shpresojmë që raporti të mos ndryshohet.
Dhe sapo ta kemi, ne planifikojmë t’i dërgojmë PPE-së një rezolutë.
Pse ka rëndësi kjo? Pse duan ta ndryshojnë raportin?
Sepse, siç ka shkruar vetë ODIHR në raportin paraprak: nuk kishte fushë loje të barabartë.
Partia Socialiste në pushtet abuzoi me burimet shtetërore, anuloi gjoba publike menjëherë para ditës së votimit, fshiu kufirin midis shtetit dhe partisë, ushtroi presion mbi punonjësit publikë për të siguruar vota, pati blerje votash, frikësim të kandidatëve dhe votuesve.

Raporti përmend gjithashtu ndikimin e krimit të organizuar në zgjedhje.
Po çfarë po ndodh me parlamentin?
Parlamenti i ri nisi punën në mes të shtatorit.
Por vetëm në disa javë, shumica qeverisëse ka rrëzuar:
1. Tri mocione debati (që lidhen me prioritetet e BE-së, abuzimin me fondet IPARD II dhe ngrirjen e 112 milionë eurove të fondeve IPARD III për fermerët);
2. Një interpelancë urgjente për hetimet mbi çështjen e njohur si rasti 'Aruba', që lidhet me hetimet e antimafies italiane, ku ka fakte për takime të anëtarëve të qeverisë shqiptare me grupe kriminale, lidhje me pastrimin e parave. Edhe kjo u bllokua;
3. Programin politik 4-vjeçar të qeverisë, debatin më të rëndësishëm, i cili duhej të zgjaste 1,500 minuta, por u mbyll në vetëm 28 minuta. Nuk na u lejua të flasim. Qytetarëve iu mohua e drejta kushtetuese për t’u informuar;
4. Gjithashtu, 15 orë debat mbi raportet e institucioneve të pavarura u refuzuan.
Pra, parlamenti nuk funksionon dhe nuk garanton të drejtat e opozitës.
Kemi nevojë për ndihmën tuaj për të ushtruar presion mbi autoritetet shqiptare, që të rivendosin funksionalitetin e institucioneve dhe të rikthejnë balancat e pushteteve në Shqipëri.
Dua të theksoj edhe një çështje alarmante: rritjen e pastrimit të parave me burim kriminal, veçanërisht në sektorin e ndërtimit dhe turizmit në Shqipëri.
Nuk e them këtë si përfaqësuese e opozitës që kërkon të sulmojë qeverinë, por sepse është një problem i madh kombëtar dhe rajonal.

Sipas Raportit të vitit 2025 të Departamentit Amerikan të Shtetit për klimën e biznesit në Shqipëri fondet e paligjshme, kryesisht nga trafiku i drogës, dominojnë ekonominë, shtrembërojnë konkurrencën dhe pengojnë investimet e ndershme.
Në Tiranë, Durrës, Vlorë dhe Sarandë ngrihen kulla luksoze e moderne, ndërkohë që qytetarët po emigrojnë.

Shikoni kulla të bukura e moderne, por gjysma e tyre janë bosh.
Nga 4 miliardë euro të shpenzuara në ndërtim, vetëm 800 milionë kanë kaluar përmes bankave; pjesa tjetër 3.2 miliardë euro, ka ardhur nga flukse të paligjshme parash në dorë.

Çdo leje ndërtimi në vend firmoset personalisht nga Kryeministri.
Kemi prova dhe fakte që shumë nga këto leje, të dhëna para, gjatë dhe pas zgjedhjeve, janë akorduar për anëtarë të grupeve kriminale, kartele droge dhe trafikantë të dënuar.

Të dashur kolegë, ky nuk është një alarm që vjen vetëm nga opozita në Shqipëri.
Është një çështje europiane, sepse këto para që pastrohen në Shqipëri do të përdoren më pas në vendet tuaja, do të ndikojnë konkurrencën e ndershme dhe do të kenë pasoja të mëdha në ekonomitë tuaja.

Prandaj, ajo që po kërkoj është një mision urgjent verifikimi në Shqipëri.
E di që e keni planifikuar, por kemi nevojë që të vijë sa më shpejt, që të mund të flisni me njerëzit, të shihni faktet dhe të krijoni bindjen tuaj.
Shqipëria po rrëshqet me shpejtësi drejt autokracisë, dhe duhet ta ndalim tani, përpara se vendi të humbasë edhe më shumë trurin e vet, qytetarët dhe demokracinë”,-deklaroi Vokshi./CNA

 

 

 

 

 





Lajmet e fundit nga