E fundit!

16:22 Aktualitet

Vrasja e policit në Maliq/ Hita: Nëse DVP Korçë do kishte kërkuar ndihmë do ishin marrë masa më të forta

Kreu i Policisë së Shtetit Skënder Hita ka zbarkuar në Kor...

Çështja "Beleri"/ Mesazhi i Jorgo Goros nga qelia për Belerin

27 Mars 2024, 12:26, Politikë CNA

Jorgo Goro

Kreu i Bashkisë së Himarës, Jorgo Goro, nga qelia, në një letër drejtuar Këshillit Bashkiak të Himarës dhe prefektit të Qarkut të Vlorës, ku njoftoi për dorëheqjen e tij, përmend edhe çështjen "Beleri".

Ai thekson se Himara është shumë e vogël për t’u bërë mollë sherri mes dy vendeve fqinje, Shqipërisë dhe Greqisë. Sipas tij, gjatë zgjedhjeve të 14 majit pati edhe manipulime nga ana e opozitës, por shprehet se mbylli gojën.

Për arrestimin e Belerit, ai thekson se s'mund të linte detyrën se s’kishte kush ta merrte.

Sipas tij, largimi në atë kohë si kryetar bashkie do të shtonte konfuzionin kur Himara u kthye në mollën e një konflikti politik absurd në nivelet më të larta mes dy shteteve.

"Megjithëse e dija se sa shumë ishin lidhur fijet e manipulimit propagandistik për gjoja shpëtimin e pronave të Himarës me fijet e manipulimit elektoral për të mbushur autobusët me premtime dhe xhepat e pasagjerëve elektoralë me para, nuk e prisja atë rezultat. Por nuk kisha as si të flisja dhe t’i hidhja benzinë një zjarri përçarjeje që përfshiu mediat e Athinës dhe Tiranës dhe arriti deri në Bruksel. Një organizatë anadollake e minoritetit fatkeqësisht bindi një shtet të BE-së se po lufton gjoja për të drejtat e njeriut në Himarë. Po në fakt ajo organizatë orkestrohet nga njerëz të paditur, pa skrupuj dhe pa ideale. Përveç parasë dhe rakisë! Marifetçinj të babëzitur që kush i njeh e di për kë dhe për çfarë flas. Tamam një çetë nga ato të kohërave të errëta që mbahet për forcë politike. Vetëm sherrin i ka parë dhe do t’i shohë Himara dhe minoriteti grek në tërësi për sa kohë nuk do t’u bjerë maska edhe në Athinë.

Himara është shumë e vogël për t’u bërë mollë sherri mes dy vendeve fqinje. Ndërsa pretendimet e mia për batërdinë që u bë me lloj-lloj marifetesh, listat e asistencave dhe bursave matanë kufirit, kërcënimet me heqjen e letrave të qëndrimit andej për të sjellë votues që kishin ikur nga Himara fëmijë dhe s’kishin shkelur më, pagesat me listë për blerje votash, nuk kishin më asnjë kuptim mbas arrestimit në flagrancë të 'fitimtarit'. I dhashë dorën sa mbaroi numërimi dhe e mbylla kapitullin tim bashkë me gojën", shprehet ndër të tjera Goro.

Raportohet se nënkryetarja Blerina Bala është pretendentja kryesore për të marrë drejtimin e përkohshëm të bashkisë.