E fundit!

13:58 Aktualitet

SPAK sekuestron pasurinë në pronësinë indirekte të Belinda Ballukut

Prokuroria e Posaçme ka vendosur masën e sekuestrimit pasu...

“E keqja e Shqipërisë quhet Edi Rama”/ Këlliçi: Na duhen reforma të thella rimëkëmbëse

12 Prill 2025, 18:28, Politikë CNA

“E keqja e Shqipërisë quhet Edi Rama”/

Këtë të shtunë, në Pallatin e Kongreseve ka nisur Kuvendi Kombëtar, ku Partia Demokratike dhe Aleanca po shpalosin programin politik 2025-2029. I pranishëm ishte edhe drejtuesi politik i PD-së për Tiranën, Belind Këlliçi. Këlliçi u ndal të një sërë çështjesh të evidentuara në këtë prag zgjedhjesh.

Këlliçi tha se për cilindo që shfaq skepticizëm mbi programin e PD-së, duhet të dinë se paratë, energjitë, njerëzit punëtorë dhe kreativë janë në PD.

Në fjalën e tij, Këlliçi u shpreh se Shqipëria ka nevojë për reforma të thella në administratë, infrastrukturë dhe mirëmenaxhim të buxhetit.

Këlliçi shtoi se PD-ja është e vendosur të heqim qafe të keqen e madhe që i ka rënë Shqipërisë, që quhet Edi Rama.

Në fund, Këlliçi tha se me votën e shqiptarëve do të shembin përfundimisht instalacionin pa leje në Kryeministri, që quhet Edi Rama.

“E kuptoni tani përse u mbush sheshi “Nënë Tereza” mbrëmë?!

Sepse Partia Demokratike nuk është vetëm një forcë opozitare, denoncuese dhe qëndrestare. Partia Demokratike është alternativa qeverisëse e besueshme dhe konkrete për shqiptarët, alternativa që ka dëshmuar në historinë e saj se mund ta çojë vendin në zenitin e rritjes ekonomike dhe zhvillimit politiko-shoqëror.

Për cilindo që shfaq skepticizëm mbi programin tonë, ne ju themi se paratë janë tashmë këtu, energjitë janë këtu, pasuritë dhe burimet natyrore janë këtu, njerëzit e mrekullueshëm punëtorë dhe kreativë janë po ashtu në këtë vend.

Ajo që mungon është vullneti për ta ngritur këtë vend në piedestalin që meriton. Dëshira për të qeverisur në mënyrë demokratike dhe jo për të sunduar me despotizëm dhe plaçkitje.

Pa asnjë dyshim që ndërhyrja e parë, emergjente dhe e drejtpërdrejtë është Paketa e Emergjencës. Nuk mund të flasim për rritje ekonomike dhe turizëm ndërkohë që pensionistët, familjet e reja, të rinjtë jetojnë në kufirin e varfërisë dhe pabarazia sociale është e skajshme.

Masa e parë është miratimi i minimumit jetik prej 200 eurosh, i cili garanton se çdo pension pleqërie, invaliditeti apo ndihmë ekonomike respekton dinjitetin njerëzor.

Paga minimale 500 euro, siguron çdo të ri apo punëtor në punët më të vështira se mund dhe duhet të ketë një shpërblim të denjë për djersën e vet.

Paga mesatare 1200 euro, i jep profesionistit në sektorin publik apo atë privat statusin që meriton dhe shanset reale për të mundësuar banim dhe mirëqenie për familjen e tij.

Çmimi i energjisë 7 lekë/Kë/h u mundëson qytetarëve të vendit me burime të mëdha hidrike që të paguajnë një çmim të drejtë, përkundër zhvatjes qeveritare të deritanishme.

Partia Demokratike angazhohet të rimëkëmbë sistemin shëndetësor:

Dyfishimi i buxhetit për shëndetësinë, sepse asnjë sistem shëndetësor serioz nuk mund të ngrihet mbi keqfinancim dhe mungesë të bazës materiale elementare.

Krijimi i një modeli të ri sigurimesh shëndetësore, që ofron më shumë mundësi dhe konkurrencë për pacientët.

Zgjerimi i listës së barnave të rimbursuara dhe garantimi i cilësisë së tyre, duke i dhënë fund ferrit të ilaçeve skadente dhe çmimeve të papërballueshme nga shtresat më të brishta ekonomikisht.

Programi për rininë, synon t’i japë fund dramës familjare dhe shoqërore të shpopullimit. Çdo prind meriton t’i ketë afër bijtë dhe bijat e veta. Çdo i ri meriton të ndërtojë të ardhmen në atdheun e vet, aty ku ka kujtimet, lidhjen emocionale dhe origjinën e pashkëputur kulturore.

Dyfishim i buxhetit për arsimin. Çdo teori zhvillimi apo ngritje sociale e vendos theksin te arsimi si faktor kyç. E nuk mund të ketë arsim modern pa një model serioz të financimit në nivelin e pagave, në shpërblim të kërkimit shkencor dhe në investime në pajisje dhe infrastrukturë arsimore.

Zërimi i taksave për 3 vite për bizneset e të rinjve. Të rinjtë shqiptarë e kanë dëshmuar në të gjithë botën se kanë shkëlqyer në rezultate studimi, pune dhe sipërmarrje. Është koha që këtë energji ta shfrytëzojmë në shtëpinë tonë.

1 çati për çdo çift. Saga e familjeve të reja për strehim duhet të marrë fund. Shteti duhet të marrë përgjegjësinë të financojë 20% të kredive dhe 30 mijë euro kredi pa interes për çdo çift.

Sigurisht që këto masa janë vetëm fillimi.

Shqipëria ka nevojë për reforma të thella në administratë, infrastrukturë dhe mirëmenaxhim të buxhetit.

Ne tashmë jemi të vendosur ta heqim qafe të keqen e madhe që i ka rënë Shqipërisë, që quhet Edi Rama.

Një fjalë e kam për të gjithë ju miq në këtë sallë dhe ata që po na ndjekin përmes ekranit.

Askush nuk më besoi dy vite më parë kur nisa rrugëtimin për çmontimin e Grupit të Strukturuar Kriminal në Bashkinë Tiranë, të drejtuar nga Erion Veliaj. Shumëkush qeshi. Shumëkush tha tërhiqu. Shumëkush ishin cinikë e mosbesues. Të tjerë madje kërcënuan.

Por ja ku jam përpara jush, pas dy vitesh, me një zotim të mbajtur.

Sot ju premtoj se, ashtu siç çmontuam kështjellën e rërës në Bashkinë Tiranë, e cila zuri nën vete tigrin prej letre Erion Veliaj, nën drejtimin e Sali Berishës, me këtë program qeverisës të shkëlqyer, me votën tuaj, me besimin në Zot e në familje, ne do të shembim përfundimisht instalacionin pa leje në Kryeministri, që quhet Edi Rama”,-tha Këlliçi./CNA