Braçe me kritika: Në mandatin e katërt, PS duhet të ndryshojë veten dhe qasjen ndaj njerëzve

31 Maj 2025, 19:45, Politikë CNA

Braçe me kritika: Në mandatin e katërt, PS duhet të

Erion Braçe ka renditur disa në kritika ndaj familjes së tij politike. I ftuar në emisionin “Kjo Javë”, Braçe deklaroi se ai dhe kolegët e tij duhet të korrigjohen pasi shpesh herë nuk kanë një qasje të përulur dhe tregohen arrogantë.

Ai tha se në mandatin e katërt të gjitha këto duhet të korrigjohen dhe duhet të shërbejë që të jenë më të përkushtuar ndaj problematikave dhe njerëzve.

Braçe theksoi se ky mandat duhet të shërbejë për të dëgjuar shumë e për të vepruar akoma edhe më shumë në raport me njerëzit.

“Problemi ynë nuk është opozita, jemi ne vetë. Nëse ne nuk korrigjohemi dhe nuk kemi një qasje të përulur, jo arrogante, në raport me njerëzit, sepse në disa raste jemi arrogantë, nuk mund të përmisohemi. Nga unë i pari, deri ata që janë në krye, nganjëherë kemi qasje arrogante, ju del natyrshëm, edhe pse mundohemi të përmbahemi. Por nuk është ky thelbi i qeverisjes. Mendoj se qeverisja ka qenë bashkëpunuese dhe e përkushtuar e kështu me radhë, siç ka edhe të meta, që patjetër duhen korrigjuar, duhen të jetë thuajse zero në këtë mandat.

Ky manadat, që është marrë me kaq shumë vota, duhet të shërbejë që të jemi gjithnjë e më shumë të përulur, në punë dhe të përkushtuar përballë problematikave, qoftë edhe një njeriu të vetëm. Mbi të gjitha, ky mandat duhet të shërbejë për të dëgjuar shumë e për të vepruar akoma edhe më shumë në raport me njerëzit”, tha Braçe.

I pyetur se çfarë duhet të ndryshojë PS, Braçe shprehet:

“Veten. Pas 12 viteve në pushtet patjetër që është e domosdoshme të ndryshosh veten. Jo thjesht dhe vetëm si individë, sepse mund të ndryshosh deputetët apo drejtuesit e partisë në nivel qendror e lokal, mund të ndryshosh kryetarët e bashkive, gjithashtu edhe ministrat, por nuk ndryshon qasjen në raport me njerëzit. Ajo që duhet të ndryshojë është qasja. Arroganca duhet të shkojë në zero dhe përkushtimi duhet të shkojë në 100%”,deklaroi Braçe./ CNA