web counter
LEXO PA REKLAMA!

SHKARKO APP

App Store
Google Play

“BE nuk ndërhyn në zgjedhje”/ Gonzato: Vlerësojmë punën që po bën SPAK-u

2 Maj 2025, 13:21, Politikë CNA

“BE nuk ndërhyn në zgjedhje”/ Gonzato:

Ambasadori i Bashkimit Europian, Silvio Gonzato, theksoi se lajmi se Delegacioni i Bashkimit Europian në Tiranë ka ndërhyrë tek ODIHR-i në raportin e tij është totalisht gënjeshtër.

Në një prononcim për mediet pas takimit me Komisionerin Shtetëror të Zgjedhjeve, Ilirjan Celibashi, Gonzato u shpreh se “Bashkimi Europian as nuk ndërhyn, as nuk manipulon në zgjedhje”.

“ODIHR-i është i pavarur dhe vepron i pavarur dhe ne as nuk mund të ndërhyjmë në raportet e tyre. Erdha për të takuar z. Celibashi, për të pasur një përditësim se si po shkon procesi”, shtoi Gonzato.

I pyetur lidhur me pastrimin e parave në Shqipëri dhe nëse mund të ndikojnë paratë e krimit të organizuar në zgjedhje, Gonzato u shpreh se “ne besojmë tek ODIHR-i, është këtu për të monitoruar të gjithë procesin zgjedhor. Lufta kundër krimit dhe korrupsionit është pjesë e negociatave me BE-në dhe ne vlerësojmë punën që po bën SPAK-u”.

I pyetur nëse reagimi i një dite më parë i delegacionit të BE-së ishte për Partinë Demokratike, Gonzato u shpreh se, “jo nuk ishte për asnjë. Ishte një deklaratë për të treguar se ne mbështesim Shqipërinë, për ta shoqëruar, nuk jemi këtu për të ndërhyrë tek procesi, nuk jemi këtu për të manipuluar asgjë. Isha pak i shokuar pasi pashë atë dhe ndjeva se duhet të reagoja. Nuk targetuam asnjë, targetuam vetëm atë informacion”.

Gonzato tha se, “kemi shprehur shpresat që parlamenti do të adoptojë të gjitha rekomandimet e ODIHR-it, përfshirë financimet e fushatës elektorale, përfshirë çështjet e shpifjeve dhe që përfshijnë aspekte të tjera të procesit zgjedhor. Besojmë se këto do të adresohen shumë shpejt nga parlamenti i ri sepse janë çështje të rëndësishme”.

Ambasadori u pyet edhe për kontratën e lobimit të PD-së në SHBA për të cilën tha se nuk “bën komente dhe do të presë autoritetet kompetente"./ CNA





Lajmet e fundit nga