web counter
LEXO PA REKLAMA!

SHKARKO APP

App Store
Google Play

Takimet elektorale PD-PS/ Zhulali: Rama ka fushatë depresive

2 Maj 2025, 11:05, Politikë CNA

Takimet elektorale PD-PS/ Zhulali: Rama ka fushatë depresive

Kandidatja për deputete e PD-së, Ilda Zhulali, ishte e ftuar në "MCN TV" dhe ka folur për fushatën që ajo dhe koalicioni ASHM po bëjnë në Tiranë.

Zhulali tha se PD, ndryshe nga kundërshtari, ka program të qartë që ofron zgjidhje për qytetarët, për ekonominë dhe biznesin. Ajo deklaroi se ndryshe nga Rama, PD ka një fushatë optimiste.

"Ka një dallim shumë të madh mes fushatave. Ne e kemi tërhequr Edi Ramën te fushata jonë. Ne kemi dalë me një program, diferenca është që kur unë e nisa fushatën duke takuar njerëzit në rrugë, pyesja a kishin dëgjuar për programin tonë, thoshin jo dhe pyesnin. Sot shoh që shumë e dinë programin tonë, është i thjeshtë, i flet ekonomisë familjare, biznesit...

Ne kemi program të qartë, që është mirëpritur dhe kuptuar nga të gjithë ata që kam takuar, mendojnë se është zgjidhja e duhur për Shqipërinë.

E dyta, mendoj se ka një diferencë të madhe në frymë mes dy fushatave. Kemi fushatë, që jo vetëm ka program të mirë, por frymë të mirë dhe pozitive, optimiste. Rama ka fushatë depresive, përbuzëse dhe tallëse. Nuk ka bilanc, nuk mban asnjë përgjegjësi për qeverisjen, shkatërrimin e institucioneve, zëre se nuk ka më institucione fare. Asgjë nuk funksionon. Asnjë institucion nuk mban era shtet. Nga momenti në moment, çdo gjë duket se do të bjerë.

Siç e kemi konstatuar të gjithë, Shqipëria është shpopulluar, e dallon dhe e ndesh në rrugë, janë më së shumti të moshuar, ka gjithmonë e më pak të rinj.

Shoh një mirëpritje nga njerëzit kur i takoj", tha Zhulali.

E pyetur se përse Edi Rama fiton vazhdimisht zgjedhjet, ajo tha se Rama nuk fiton, por vjedh.

"Qytetarët nuk thonë se do t'i fitojë Rama zgjedhjet, por kanë frikë se Rama i vjedh sërish zgjedhjet. Ne kemi qenë dëshmitarë, nuk është vetëm pretendim i opozitës, është dokumentuar, ka dosje në prokurori, kanë rënë njerëzit në përgjime, zyrtarët më të lartë të qeverisë. Vjedhja e zgjedhjeve është e dokumentuar. Ajo që ka ndodhur, faktori ndërkombëtar i ka mbyllur sytë para kësaj", deklaroi Zhulali./ CNA





Lajmet e fundit nga