web counter
LEXO PA REKLAMA!

SHKARKO APP

App Store
Google Play

E fundit!

x

4 kandidatë në garë/ Kuvendi zgjedh nesër Kryetarin e Komisionit të Autoritetit të Konkurrencës

15 Prill 2026, 21:16, Politikë CNA

4 kandidatë në garë/ Kuvendi zgjedh nesër Kryetarin e

Në seancën plenare që do të mbahet nesër në Kuvendin e Shqipërisë, në rendin e ditës është edhe projektvendimi për zgjedhjen e Kryetarit të Komisionit të Autoritetit të Konkurrencës.

“Projektvendimi “Për zgjedhjen e Kryetarit të Komisionit të Autoritetit të Konkurrencës”. (Në mbështetje të nenit 78 të Kushtetutës, të nenit 21 të ligjit nr. 9121, datë 28.7.2003, “Për mbrojtjen e konkurrencës”, të ndryshuar”, si dhe të neneve 55 dhe 111, të Rregullores së Kuvendit, shumicë të thjeshtë votash për miratim) Koha e votimit”,-thuhet në njoftim.

Kandidatët që kanë aplikuar për këtë pozicion janë katër: kryetari aktual i Komisionit të Konkurrencës, Denar Biba, Pajtim Melani, Elidian Balla dhe Evis Noçka.

Kriteret kryesore për kandidatët në proces është që të jenë shtetas shqiptarë, të kenë vjetërsi pune në profesion jo më pak se 15 vjet dhe të jenë, prej jo më pak se 5 vjetësh, pjesëtarë të trupit akademik universitar ose të mbajnë titullin apo gradë shkencore në fushën e ekonomisë ose të drejtësisë, në specialitetin “E drejtë civile/ administrative”, si edhe të mos jenë larguar nga puna ose nga shërbimi civil me masë disiplinore.

Sipas ligjit, anëtarët e Komisionit të Konkurrencës zgjidhen nga Kuvendi. Një anëtar propozohet nga Presidenti i Republikës, dy anëtarë propozohen nga Këshilli i Ministrave dhe dy anëtarë propozohen nga Kuvendi.

Ligji parashikon që anëtarët e Komisionit zgjidhen me shumicë votash, në prani të më shumë se gjysmës së të gjithë anëtarëve të Kuvendit të Republikës së Shqipërisë, për një periudhë 5-vjeçare. Kuvendi emëron edhe Kryetarin e Komisionit./CNA





Lajmet e fundit nga