E fundit!

12:47 Kronika

Zjarret në qershor-korrik/ 29 autorë të arrestuar dhe të proceduar penalisht

29 autorë të zjarrvënieve në vend janë arrestuar dhe proce...

“Shqiptarët vazhdojnë të largohen nga vendi”/ Boçi: Shkak korrupsioni dhe mungesa e lirive

14 Prill 2026, 17:19, Politikë CNA

“Shqiptarët vazhdojnë të largohen nga vendi”/

Nënkryetari i Partisë Demokratike, Luçiano Boçi tha sot se shumë qytetarë shqiptarë dhe familje shqiptare po vijojnë të largohen nga vendi, pavarësisht retorikës politike dhe fjalimeve emocionale që bëhen nga qeveria.

I ftuar në ‘Syri Tv’, Boçi theksoi se arsyet kryesore që i shtyjnë shqiptarët të largohen janë korrupsioni dhe mungesa e lirisë në disa drejtime, përfshirë lirinë politike dhe atë ekonomike.

Sipas demokratit, veç ikjes së elitës, sot Shqipëria përballet edhe me një problematikë tjetër, që lidhet me rënien e frikshme të numrit të popullsisë.

“Shqiptarët vazhdojnë të ikin përtej retorikës së bukur, përtej fjalimeve emocionale, sepse thashë, këto samite sundohen nga emocioni dhe jo nga arsyeja. E vërteta është krejt e errët dhe sot që flasim, dëshira më e madhe e të rinjve, sipas sondazheve, është të largohen nga vendi. Sot, dëshira e familjeve të reja shqiptare është të largohen për shkak të realitetit të qeverisjes, për shkak të korrupsionit dhe mungesës së asaj lirie që fillon nga liria politike dhe deri tek liritë ekonomike, gjëra që janë të prekshme dhe janë të vërtetueshme. Dhe, ai që e vërteton më shumë është reagimi i të rinjve dhe reagimi i familjeve të reja. Por nuk mungojnë edhe familje që ndoshta kanë ndërtuar një lloj të themi ritmi jete këtu, por u mungon siguria, u mungon e ardhmja e fëmijëve dhe ata kanë vendosur të largohen. Përderisa sipas statistikave, ka ikur elita, ka ikur pjesa më e suksesshme e shoqërisë dhe Shqipëria ka një rënie të frikshme të numrit të popullsisë. Ne këtë e vërejmë edhe në analizat që bëjmë në kuadrin e reformës territoriale, ku fshatra të tërë janë braktisur, zona të tëra kanë humbur peshën e të rinjve dhe qytete të tëra në Shqipëri kanë humbur kontributin themelor, pasurisë themelore që ka pasur Shqipëria”,-tha Boçi./CNA