14 maji, Sotiraq Filo vs Ledina Aliolli/ Gara për Bashkinë e Korçës

11 Maj 2023, 15:06, Politikë CNA

14 maji, Sotiraq Filo vs Ledina Aliolli/ Gara për Bashkinë e

Në zgjedhjet e 14 majit për Bashkinë Korçë do të garojnë Sotiraq Filo nga Partia Socialiste dhe Ledina Alolli nga koalicioni "Bashkë Fitojmë".

Sotiraq Filo është në kërkim të mandatit të 3-të të plotë pasi ka drejtuar Bashkinë Korçë edhe për një gjysmë mandati në vitin 2013, atëherë kur Niko Peleshi pati dhënë dorëheqjen.

Para zgjedhjes si kryetar bashkie, ai ka shërbyer si nënkryetar i saj për një periudhë prej 6 vitesh.

Gjatë kësaj fushate, Filo po zhvillon takime jo vetëm në qytet, por edhe në zonat rurale i shoqëruar nga përfaqësues të Partisë Socialiste si dhe nga ministri Niko Peleshi i deleguar në këto zgjedhje.

Në programin e tij për mandatin e radhës Sotiraq Filo premton përfundimin e termoizolimit të banesave kolektive në Korçë si dhe projektin e gazifikimit të qytetit për ngrohjen e familjeve.

Ndërtimi i aeroportit turistik dhe sportiv si edhe "Korçarena" që përfshin stadiumin e ri, pishinën dimërore dhe rikonstruksionin e Pallatit të Sportit janë pjesë e programit.

Vlerë e shtuar për turizmin do të jenë sportet dimërore ku do të ndërtohet një resort dimëror dhe një pistë skish.

Përballë kryetarit aktual të bashkisë është kandidatja Ledina Aliolli, e zgjedhur me votëbesimin e demokratëve gjatë Primareve.

Ledina Aliolli është pedagoge dhe dekane e ekonomisë në Fakultetin Ekonomik në Universitetin "Fan Noli" të Korçës me një karrierë të gjatë si në botën akademike e po ashtu edhe në politikë.

Për Aliollin, sfida për kryebashkiake të Korçës është tepër e rëndësishme, pasi për të do të jetë mandati i parë, ndërsa më herët ka qenë deputete e Parlamentit të Shqipërisë. Slogani i fushatës është: "Korça në duart e tua".

Në programin e saj Aliolli si projekt madhor premton termoizolimin e të gjitha banesave të Korçës po ashtu edhe projektin e ngrohjes qendrore të qytetit. Disa pika të tjera të programit të saj janë: ulja e taksave, përgjysmimi i çmimit të druve të zjarrit, parkimi falas në të gjithë territorin e Bashkisë Korçë, ndërtimi i një parkingu të madh nëntokësor dhe mbështetje e zonave rurale.

Fokus, në 4-vjeçarin e këtij mandati, do t'i jepet turizmit, zhvillimit social dhe atij bujqësor, po ashtu dhe përmirësimit të infrastrukturës.

Gara e dy kandidatëve, Filo dhe Aliolli, pritet të jetë e fortë, ndonëse të dy po zhvillojnë një fushatë të qetë duke zhvilluar takime me banorë të qytetit dhe fshatrave të Bashkisë Korçë./ CNA.al