E fundit!

20:55 Denoncim

FOTOLAJM/ Adoleshentët gara me motorë e skuterë në Parkun e Liqenit, policët bashkiakë me sy në telefon

Qytetarët që kalojnë pasditen pranë Liqenit Artificial në ...

Verërat që dehën pushtetin!

9 Janar 2026, 18:29, Opinione Grigels Muçollari

Ka momente kur një shoqëri duhet të ndalet dhe të pyesë veten: ku kemi mbërritur?

Shqipëria sot nuk është vetëm e lodhur. Është e plagosur. E plagosur nga korrupsioni i shndërruar në sistem, nga një pushtet që nuk njeh më kufij dhe nga një republikë parlamentare që po shuhet para syve tanë. Institucionet që duhej të mbanin balancën e pushtetit janë përkulur. Parlamenti hesht. Kontrolli mungon. Vendimmarrja është përqendruar në një dorë të vetme.

Në këtë errësirë, “vererat që dehen pushtetin” nuk është figurë poetike. Është simbol i një arrogance reale. Verërat e sekuestruara nga SPAK, prova të hetimeve për korrupsion, u zhdukën. U vodhën nga vetë shteti. Një akt i vogël në pamje të parë, por me domethënie të madhe: kur pushteti vjedh provat, ai shpall hapur se nuk i frikësohet më ligjit. Se ndihet i paprekshëm. Se është dehur nga pushteti i vet.

Dhe një pushtet i dehur nuk sheh më drejt. Godet drejtësinë. Sulmon prokurorët. Tall hetimet. Ushtron presion. Kërkon ta nënshtrrojë ligjin, jo t’i bindet atij. Kjo nuk është më thjesht krizë politike; është kërcënim i drejtpërdrejtë ndaj shtetit të së drejtës.

Ndërkohë, vullneti i qytetarëve deformohet. Zgjedhjet mbahen, por liria e votës gërryhet nga frika, varfëria, shantazhi dhe lidhjet e errëta të pushtetit me krimin e organizuar. Shteti dobësohet, siguria kombëtare rrëshqet dhe bandat fitojnë terren.

Ligji nuk sundon më njësoj për të gjithë.

Pikërisht për këtë arsye, kërkesa për dorëheqjen e qeverisë dhe ngritjen e një qeverie teknike nuk është hakmarrje politike. Është thirrje për shpëtim institucional. Është përpjekje për të ndalur rrëshqitjen përpara se të bëhet humnerë. Një qeveri teknike nuk është zgjidhje magjike, por është minimumi i nevojshëm për të kthyer besimin, për të garantuar zgjedhje të lira dhe për t’i dhënë frymë republikës.