E fundit!

17:11 Kronika

Pasuri me burime kriminale/ Sekuestrohen pronat e një shtetasi me vlerë marramendëse

Një operacion i koduar “De facto”nga Policia e Tiranës ka ...

Tallja me varfërinë!

28 Janar 2026, 15:10, Opinione Belind Këlliçi

Dje foli në Kuvend Petrit Malaj, ministër i Financave. Një emër që askush nuk e njihte më parë dhe që askush nuk do ta mbajë mend pasi të lërë detyrën.

Kjo, jo për faj të tij, po për faj të modelit thellësisht autokratik të qeverisjes ku ministrat nuk kanë asnjë peshë politike ndërsa Sulltani luan me ta si birila duke i ndërruar dhe shkëmbyer me njëri-tjetrin.

Ministri prezantoi aktin normativ të radhës mbi buxhetin dhe tha se çdo lek i pashpenzuar nga institucionet do të kalojë në llogarinë e pensioneve dhe do të mbështesë shtresat në nevojë.

Kjo është një tallje e hapur me shtresat më të brishta të shoqërisë shqiptare të cilat jo vetëm që nuk janë prioritet i kësaj qeverie, por trajtohen me lëmoshë me thërrimet që mbeten pas shpërdorimit të buxhetit.

Së pari, duhet të shtrojmë pyetjen pse buxheti i shtetit ka një suficit që arrin në 500 milionë euro?

A vjen mosrealizimi i investimeve në ministri, pushtet vendor, ARRSH, AKSHI si pasojë direkte e arrestimeve të zyrtarëve të lartë dhe frikës së pasardhësve të tyre për të firmosur aferat e maskuara si investime kapitale?

A e ka luksin Shqipëria të mbetet me suficit në buxhet në një kohë kur infrastruktura dhe shërbimet publike janë në pikën më të dobët?

A e meritojnë pensionistët, familjet në nevojë, personat me aftësi ndryshe të trajtohen si kërkues lëmoshe dhe të jetojnë nën minimumin jetik, me ndihma sociale qesharake?

Kjo tregon atë që PD e ka thënë në krye të herës.

Qytetarët, familjet në nevojë, rrugët, spitalet dhe shkollat e këtij vendi nuk jane prioritet i kësaj qeverie.

Prioriteti i vetëm dhe i padiskutuar është korrupsioni.

Zhvatja masive e buxhetit të shtetit, e cila përkthehet më pas në blerje votash me qëllimin për të zhvatur akoma më shumë.

Shqiptarët? Ata duhet të mbijetojnë, të trajtohen si qytetarë të dorës së dytë në shtëpinë e tyre ndërsa klientët e qeverisë pasurohen në mënyrë përrallore.

Është koha për t’i dhënë fund këtij sistemi të sëmurë dhe për t’i kthyer dinjitetin çdo shqiptari të ndershëm./ CNA