Propagandistët më të shpifur të pushtetit

29 Korrik 2025, 18:37, Opinione Ermal Mulosmani

Propagandistët më të shpifur të një pushteti janë ata që pranojnë defektet por i relativizojnë ato.
Shikoni titullin e Pjeshkës. “Diktatura liberale e Edi Ramës” - thotë.
Me shpresë që ndonjë naiv do të lexojë se çfarë ka broçkullisur. Kuptohet menjëherë thelbi.
Po çfarë diktatori mund të jetë një liberal? – është nënteksti i Pjeshkës.
Pastaj a krahasohet ai me Berishën?! Që komandonte të gjitha pushtetet, që të vriste po të protestoje kundër tij; që përdorte drejtësinë, që nuk hapte kutitë etj etj. Ai ka qenë edhe diktator edhe illiberal. Mosozot të na kthehet.
Tani, ky Edi Rama, vërtetë komandon cep më cep dhe dikton gjithcka por ky të lë të protestosh, të lë të marrësh ndonjë votë, madje edhe të numëron votat drejt. Pra vërtetë është Perandor por në Perandorinë e tij ka edhe vend për ndonjë votë opozitare...

E vërteta është që ky është iliberali më i madh.
Rama nuk vjedh vota dhe hap kutitë sa herë të duash ti sepse e di shumë mirë, qysh më parë, rezultatin e atyre kutive. Inxhinieringu i votës e lejon Edi Ramën që edhe të tallet me Opozitën: “A doni t’i numëroni prapë”?
Drama më e madhe e demokracisë nuk është numërimi ekzakt i votës. Ajo është drama fillestare e saj, elementare, e viteve të para. Me këtë fenomen u ndeshëm në kohën e Berishës. Ai ngaqë nuk e dinte rezultatin dhe kishte frikë, urdhëronte të vidhej ndonjë votë. E bënte trashë me shumë gjurmë. Opozita e Berishës e kuptonte dhe bënte thirrje të hapeshin kutitë. Po si t’i hapte kutitë kur kishte vjedhur ndonjë votë aty -këtu?!
I ngrati, refuzonte gjithë frikë. Çohej populli opozitar: “Hap kutitë apo largohu” dhe ekspozohej Berisha si diktator dhe illiberal.

Ndërsa "liberali" diktator, Edi Rama jo vetëm që të lë të protestosh por edhe të përtall popullin. Ai të thotë: “Ngrihu ngrihu por atij të ngratit nuk i ngrihet”.
Edi Rama nuk vjedh në kuti, ai blen popullin me klientë pushteti (biznesmenë), patronazhistë, pushtetarë dhe kriminelë. Kjo amalgamë interesash është si një tentakulë oktapodi që e kap elektoratin (edhe ashtu të hutuar) për interesin e momentit.
Ka një piramidë kapilare në çdo qendër votimi, në çdo shtëpi banimi, në çdo votues. Një patronazhist-një votues-një financues.

Ku është parë ndonjëherë që Kryeministri i një vendi të thotë 10 ditë para zgjedhjeve me një saktësi milimetrike rezultatin e saktë të tyre më mirë se të gjitha sondazhet më të njohura?!
Kjo gjë arrihet vetëm kur të dhënat kapilare nga terreni e lajmërojnë. E vetmja garanci është blerja dhe kushtëzimi i votës.
Më ka rënë rasti këto zgjedhje të kuptoj që një biznesmen shumë i njohur, milioner, pyeste si në ethe për një rezultat të një minibashkie me dy tri qendra. Aq kishte marrë përsipër duket.
Pyeste për çdo votë të numëruar, në ankth si të ishte rezultati i një tenderi shumë milionësh. Nuk kishte faj i shkreti. Nga rezultati i atyre tri qendrave të votimit varej suksesi i biznesit të tij në 4 vitet e ardhshme. Ai duhej të merrte +1400 vota.
Dridhej si purtekë kur shkuan +1300.
“Edhe sa vota kanë mbetë për numërim” – pyeste me gojën e tharë nga ankthi. Kur kapi shifrën festoi si I marrë. Por këto nuk i di Pjeshka.

Kjo është arsyeja pse Edi Rama të lë të protestosh, të lë të hapësh kutitë, të lë të marrësh ndonjë votë. Sepse ka të menaxhuar rezultatin. Ky nuk është liberalizëm, ky është liberalizëm fake, është asfiksim, paralizim. Është si vrasjet e kundërshtarëve të Putinit. E marrin helmin me kohë dhe vdesin çdo ditë nga pak.
Derisa vdekja të quhet natyrale dhe Pjeshkat të deklarojnë: "Vdiq nga një infeksion në bajame".
Prandaj më vjen të vjell kur shoh këta avoketër të djallit të na japin leksione teorike demokracie./ CNA