E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Luiza Gega, Çiljeta Xhilaga, Roland Hysi e të tjerë duhet të akuzohen sot!

13 Shkurt 2025, 11:42, Opinione Isa Myzyraj

Luiza Gega, Çiljeta Xhilaga, Roland Hysi e të tjerë duhet

Jo sepse kanë mbështetur një politikan të caktuar. Jo sepse janë përkrahës të Erion Veliajt. Jo sepse kanë zgjedhur të jenë pranë një pushteti. Ata duhet të akuzohen sepse, me heshtjen e tyre, me mbështetjen e tyre të verbër, me përkuljen e tyre para një sistemi të dyshuar kriminal, po e legjitimojnë padrejtësinë, po e normalizojnë korrupsionin dhe po e shesin shpirtin e këtij vendi për interesa personale.

Ata, sportistë dhe artistë të respektuar deri sot, nuk përfaqësojnë më forcën, talentin dhe meritokracinë. Sot, ata përfaqësojnë një sistem që i përdor njerëzit si marioneta. Ata nuk janë më thjesht individë me karrierë; ata janë bërë simboli i nënshtrimit, i shitjes së dinjitetit për përfitime të vogla dhe i pajtimit me një realitet ku dhuna, padrejtësia dhe pabarazia janë bërë normë.

Ku ishin ata kur, në orën 5 të mëngjesit, familjet e varfra të Unazës së Re u zgjuan nga tymi i gazit lotsjellës? Kur fëmijët qanin të tmerruar, ndërsa prindërit e tyre luteshin që të mos i nxirrnin nga shtëpitë e tyre? Ku ishin kur krismat e fadromave shembën Teatrin Kombëtar në errësirë, duke shkatërruar jo vetëm një godinë, por edhe dinjitetin dhe kulturën e këtij kombi?

Ku ishin kur Ardit Gjokaj, një fëmijë vetëm 17 vjeç, humbi jetën në mënyrën më të tmerrshme, në një vend ku nuk duhej të ndodhej kurrë, duke punuar ilegalisht për një sistem që shfrytëzon të rinjtë dhe pastaj i flak si të mos kishin ekzistuar kurrë? A e ndjeu ndokush nga ata dhimbjen e prindërve të tij? A pati ndonjëri guximin të ngrejë zërin?

Ku ishin kur artistët dhe sportistët e ndershëm, që nuk pranuan të përkuleshin, u përjashtuan, u poshtëruan dhe u lanë në harresë sepse nuk i shërbenin interesave të pushtetit? Kur talentet e reja u hodhën mënjanë për t’i bërë vend servilëve dhe militantëve?

Ata heshtën. Ata heshtën atëherë dhe heshtin edhe sot. Dhe heshtja e tyre nuk është thjesht indiferencë. Është bashkëfajësi. Sepse kur sheh të keqen dhe zgjedh të mos flasësh, ti nuk je më i pafajshëm. Ti je pjesë e saj.

Sot, ata dalin dhe mbrojnë një pushtet të dyshuar për korrupsion, për dhunë, për padrejtësi. Ata dalin dhe e zbukurojnë me fjalë të bukura, me imazhin e tyre, një realitet të shëmtuar që shumica e qytetarëve e përjeton çdo ditë në formën e padrejtësisë, varfërisë dhe pasigurisë. Ata nuk janë më thjesht artistë dhe sportistë. Ata janë bërë pjesë e një mekanizmi që shtyp dhe vret shpresën.

Dhe për këtë, ata duhet të mbajnë përgjegjësi. Para publikut. Para historisë. Para ndërgjegjes së tyre, nëse u ka mbetur ende diçka prej saj.

Ata sot duhet të akuzohen nga publiku!/ CNA