E fundit!

07:10 Ekonomi

Kursi i këmbimit, 17 korrik 2026

Këtë të premte një dollar amerikan blihet me 81.2 lekë dhe...

Rama po urdhëron Komisionin "Xhafaj" të kthejë në shina SPAK-un

12 Shkurt 2025, 16:26, Opinione Afrim Krasniqi

Kryeministri mbajti disa fjalime 24 orët e fundit kundër SPAK, institucioneve të drejtësisë dhe proceseve hetimore ndaj bashkëpunëtorëve të tij të afërm. Ai e shfaqi veten në rolin e prokurorit, hetuesit, gjyqtarit, si dhe paralajmëroi se nuk do t’i përgjigjet SPAK nëse do të ketë hetime ndaj tij. Ai ndryshoi 180 gradë qëndrimin politik të deklaruar deri tani ndaj reformës në drejtësi dhe SPAK duke udhëzuar partinë e tij të ketë një fushatë denigrimi ndaj prokurorëve, hetuesve dhe gjyqtarëve që po trajtojnë skandale korruptive të zyrtarëve të lartë të PS.

Kryeministri tha se SPAK ka dalë nga shinat kushtetuese dhe la të kuptohet se PS do të reagojë për “ta kthyer në shina”, duke sugjeruar që SPAK të merret me një dosje tjetër që lidhet me një politikan të opozitës, jo me atë të kryetarit të bashkisë Tiranë.

Ky është një zhvillim i ri, Rama dhe PS imitojnë atë që kanë kritikuar përgjatë dy viteve të fundit, - sjelljen e njëjtë të mbajtur nga PD dhe lideri i saj. Për ta përmbyllur ciklin “të gjithë duken të ndryshëm por janë të njëjtë” militantët e PS protestuan sot rreth godinës së SPAK dhe ushtria në media nisi fushatë denigruese ndaj tyre.

Rama po urdhëron Komisionin "Xhafaj" të kthejë në

Sot PS kishte mbledhjen e grupit parlamentar. Aty ishin të gjithë anëtarët e PS në Komisionin e Posaçëm Antikorrupsion që drejtohet nga ish-ministri Xhafaj. Në një situatë imagjinare, - ata janë ngritur dhe kanë kritikuar qasjen e kryeministrit dhe PS, duke thënë se respektojmë ndarjen e pushteteve, PS nuk sulmon SPAK, përgjegjësia është individuale, qeveria shkel Kushtetutën nëse hyn në kompetencat e drejtësisë, kërcënimi i dëshmitarëve është shkelje ligji, etj, etj.

Sepse gjithçka që kryeministri tha bie në kundërshtim me objektin e komisionit, deklarimet e tij, premtimet e tij dhe garancitë e tij publike e ndërkombëtare se nuk do të cenojë asnjë element të pavarësisë së institucioneve të drejtësisë dhe as reformën në drejtësi. Në situatë imagjinare. Në situatën reale, të gjithë anëtarët e Komisionit të Posaçëm ishin dakord me kryeministrin dhe premtimin e tij për të ndërmarrë masa për kthimin e SPAK në shina kushtetuese, etj, etj, etj, etj.

Rama po urdhëron Komisionin "Xhafaj" të kthejë në

Tani komisionit i mbetet të zbardhë në letër porositë e shefit të partisë, kryeministrit, i cili bën edhe emërimin e anëtarëve të tij si deputet për legjislaturën e ardhshme.
Për të qenë serioz deri në fund: Asnjë nga tri partitë kryesore nuk është më pro 140 votave të dhëna në korrik 2017 për reformën në drejtësi. Partitë e tjera nuk kanë rol dhe as fuqi ndikuese. Të kundërtat po bashkohen kundër interesit publik.

Rama po urdhëron Komisionin "Xhafaj" të kthejë në

Ky është një zhvillim i rëndësishëm negativ, fyes për integritetin e shtetit dhe reformës në drejtësi, denigrues për vlerat e demokracisë dhe shtetit të së drejtës dhe paralajmërues se aktorët kryesorë politikë kanë qenë, janë e do të jenë kundër çdo mase antikorrupsion që cenon sistemin e tyre korruptiv, klientelist dhe abuzues me shtetin, ligjet, pronat, votat, hapësirën publike dhe me interesat e vendit.

Pyetja që mbetet: A ka deputetë me integritet brenda partive që dijnë të bëjnë dallimin dhe kanë kurajë të flasin, të reagojnë, të ndryshojnë qasje dhe të jetësojnë parimin kushtetues se përpara ligjit të gjithë jemi të barabartë? A ka zëra moderatorë në partitë politike respektive që shohin përtej 11 majit dhe halleve të shefave me drejtësinë? A ka shoqëria shqiptare fuqi dhe energji reformatore apo është e destinuar të ripërsërisë gabimet e vetvetes?