Kosova nderon Reçakun; shteti shqiptar përçmon masakrën komuniste të Lushnjës

15 Janar 2026, 15:15, Opinione Besim Ndregjoni

Kosova nderon Reçakun; shteti shqiptar përçmon masakrën

Sot mbushen 27 vite të Masakrës së Reçakut, ku më 15 janar 1999, në këtë fshat forcat serbe vranë 45 civilë shqiptarë. Me këtë rast do të organizohen aktivitete përkujtimore me rastin e 27-vjetorit të Masakrës së Reçakut.

Kosova nderon Reçakun; shteti shqiptar përçmon masakrën

Kosova shënon 27-vjetorin e Masakrës së Reçakut, një nga ngjarjet më të rënda të historisë së fundit të Kosovës. Republika e Kosovës e quan këtë masakër “Dita e Reçakut”. Institucionet vendore dhe qendrore, së bashku me shoqatat, organizojnë një sërë aktivitetesh në nderim dhe kujtim të viktimave, me qëllim ruajtjen e së vërtetës historike dhe përcjelljen e saj te brezat e rinj. Dhe kështu Kosova nderon të kaluarën e vet. Tregon se nuk ndërtohet e ardhmja pa nderuar të kaluarën! Dhe sot bashkëkombësit e mi shqiptarë të Kosovës nderojnë sakrificën e tyre për liri dhe ndërtojnë paqen dhe të ardhmen e qytetarëve të tyre!

Këto aktivitete mbahen nën patronatin e Presidentes së Republikës së Kosovës, Vjosa Osmani, kryetarit të Kuvendit, Dimal Basha, Kryeministrit në detyrë të Republikës së Kosovës, Albin Kurti, kryetarit të Komunës së Shtimes, Qemajl Aliu.

Ndryshe ndodh në Shqipëri me masakrat që kanë bërë enveristët në bashkëpunim dhe udhëzim të emisarëve serbë që drejtonin këtë formacion terrorist në Shqipëri! Sipas dëshmive të Xh. Staraveckës, i pranishëm në këtë masakër kolektive, pushkatimet u urdhëruan nga Mehmet Shehu dhe Dushan Mugosha, i cili ishte i plotfuqishëm në Brigadën I. Fiqrete Sanxhaktari (Shehu) ndikoi te Mehmeti për të hequr nga rreshti i ekzekutimit 10 “lafshëpaprerë”, meqenëse balanca rëndonte nga ortodoksët, për t’i bërë qejfin Dushanit. Me gjithë 12 të vrarët në përpjekje dhe tre të tjerëve që Mehmet Shehu i mori me vete dhe i pushkatoi, numri i këtyre viktimave arriti në rreth 80 vetë.

Prej katundit Remas: Rako Nako, Bani Lika, Ramë Koçi, Prof. Gjata, Qazim Pina.
Kryekuq: Murat Malsori, Hysen Ismaili, Osman Plaku, Hamdi Çoku, Shyqyri Leka.
Shënkollas: Tafil Doka, Daut Gjata, Haxhi Dedej.
Grabian: Ndin Ndoni, Gaqo Ndoni.
Çiflig: Beqir Cani, Sabri Bullari, Tafil Llusha, Roç Llusha, Ymer Bullari, Haxhi Sina, Arif Halili.
Prej katundit Kalosh: Shemsi Arapi, Cen Arapi, Nazif Qylafi.
Prej katundit Gur: Selim Kuqi, Til Bello.
Shënepremte: Haxhi Murrizi, Kadri Murrizi, Avni Murrizi, Hysen Murrizi, Ismail Murrizi.
Sulzotaj: Trifon Gjeko, Alush Kasemi, Met Kasemi.
Prej katundit Biçak: Asllan Vrapi, Elmas Xhepa, Arif Muça, Rakip Xhepa, Bajram Agushi, Shaqir Sula, Çaush Xhepa, Shaban Sina, Haxhi Sina dhe Ndoni Sako, Fani Trungu, Gori Todi, Jani Gjeka, Jorgji Gjoni, Jorgji Lala, Kozma Zhuka, Ibrahim Luzha, Nasi Zhuka, Koli Tashi, Kristo Shkoza, Loni Bita, Llazi Prifti, Lili Shkoza, Mihal Bita, Nasi Janko, Nasi Sako, Nasi Zaho, Perikli Prendi, Pali Zaka, Ristan Bani, Simon Gjini, Stefan Prendi, Todi Gjurgji, Vasil Përboti, Myslim Bedalli, Bajram Jeshili, Mehdi Pirra, Ruho Nako, Hysen Dupi, Latif Karafili, Muharrem Meshani, Bajram Bilbili, Ismail Koçiu, Isuf Buzi, Ramazan Kofsha, Shefik Tota, Gori Lala e të tjerë.
(AQSH F.41 v.1943 d.32 dhe “Gjëmat e komunizmit”)

Vllas Arapi (Pelivani), kuadër i Brig. I, që erdhi pas masakrës, i tha Mehmetit:
“Këta pushkatove ti? Trimëri të madhe paske treguar!”
M. Shehu iu përgjigj:
“Kjo s’është asgjë, me ato që kam parë unë në luftën e Spanjës. Atje janë derdhur lumenj gjaku…”
(F. Arapi, Kush ishte Vllas Arapi, Tiranë 2000)

Në këtë përgjakje të luftës civile, ishte politika e PKJ-së dhe dora e emisarëve të saj M. Popoviç dhe D. Mugosha.
“Dy serbët e mallkuar, që rrinë në krye të Partisë Komuniste Shqiptare, sot fërkojnë duart kur shohin se propaganda e tyre, për të cilën ishin dërguar, e bëri punën. Ah, ç’mjerim! Popullin shqiptar e hodhën në vëllavrasje” – thuhet në një dokument të asaj kohe.
(AQSH F.270 d.11 v.1943)

Po sot ata që e bënë këtë masakër, ata terroristë, nderohen nga shteti i rilindjes komuniste me titullin e lartë “Nderi i Kombit”. Në të gjitha masakrat që kanë kryer enveristët ndaj nacionalistëve dhe antikomunistëve, drejtuesit e shtetit shqiptar heshtin. Kryeministri i vendit përçmon çdo sakrificë të shqiptarëve antikomunistë dhe nderon paraardhësit e tij kriminelë, që nën drejtim serb zhvilluan luftë civile në Shqipëri gjatë Luftës së Dytë Botërore!

Kur një populli i ikën frika, atij së shpejti i vjen liria!
Një kujtesë SOT, më e nevojshme se kurrë për shqiptarët në të gjithë botën!

“Shqipni, qëndro në lartësinë e kësaj Beteje të Madhe!”