Nga "21 janari" e krimet zgjedhore tek operacionet e BKH-së/ Raportimet e kreut të SPAK-ut në komisionet parlamentare

Kreu i SPAK-ut, Klodjan Braho, në raportimin e veprimtarisë vjetore të SPAK-ut në Komisionin e Ligjeve u ndal edhe te mandati i kufizuar i prokurorëve të posaçëm.

Braho u shpreh për pamundësinë për të riaplikuar për prokuror të posaçëm pas mbarimit të mandatit 9-vjeçar është një problematikë e përsëritur.

Problematikë për të cilën, Braho tha se kërkon vëmendje pasi lidhet jo vetëm me karrierën e prokurorit, por dhe me vazhdimësinë e SPAK.

Pamundësia për të aplikuar, tha Braho, ndikon në vijimësinë e punës.

“Kjo është një problematikë e përsëritur, dhe që kërkon vëmendje. Kjo nuk lidhet vetëm me karrierën tonë, por edhe me vazhdimësinë e institucionit. Ne kemi mandat 9-vjeçar, dhe secili prokuror duhet të ushtrojë detyrën e vet, dhe ne nuk kemi strategji tjetër, do të vazhdojmë punën. Nëse nuk kemi të drejtë për të riaplikuar ose vazhdimësi, kjo është problematikë e strukturës dhe vijimësisë së punës”, tha Braho.

Kreu i SPAK-ut, Klodjan Braho, në raportimin e tij për veprimtarinë vjetore të 2025-ës, është pyetur edhe për operacionet e BKH-së pa praninë e Policisë së Shtetit.

Braho tha se në vitin 2025 referimet penale nga policia kanë qenë në rritje, por pritet më shumë nga policia.

Më tej, drejtuesi i SPAK-ut duke u ndalur te veprimet e BKH-së tha se janë veprime procedurale që i lejon ligji dhe nuk synon zëvendësimin e Policisë së Shtetit.

“Gjatë 2025, referimet penale janë rritur në SPAK. Dhe gjatë 2026 kemi pasur referime. Kemi vlerësim të madh për Policinë e Shtetit. Ndonjëri prej tyre mund të ketë probleme me ligjin, apo dyshojmë ne se mund të ketë.

Ne presim më shumë nga Policia e Shtetit. Veprimet që mund të kryejë BKH janë veprime procedurale që ligji ia lejon BKH-së. Pengesat mund të vijnë për shkak të mungesës së infrastrukturës operacionale. Nuk mund ta zëvendësojmë Policinë e Shtetit, por veprimet e BKH-së pa policinë janë një praktikë që e kemi parë edhe në institucionet homologe me të cilat bashkëpunojmë”, tha Braho.

I pranishëm në Komisionin e Ligjeve, ku raportoi për veprimtarinë vjetore të vitit 2025, kreu i SPAK-ut, Klodjan Braho, u pyet edhe për çështjen e 21 janarit.

Braho tha se kjo çështje është ende nën hetim dhe nuk mund të japë detaje.

Drejtuesi i SPAK-ut u shpreh se e kupton ndjeshmërinë e rastit, por nuk është çështje që mund të zgjidhet në komision parlamentar.

Sa u përket pretendimeve të palëve, Braho tha se duhet t’i drejtohen SPAK-ut për të marrë përgjigjet që kërkojnë sipas Kodit.

“Është çështje nën hetim dhe hetimet vazhdojnë. E kuptoj ndjeshmërinë e rastit, por nuk e zgjidhim dot në këtë seancë. Nëse palët kanë pretendime t’i drejtohen SPAK-ut për të marrë përgjigje sipas Kodit”, tha Braho.

I pranishëm në seancën dëgjimore në Komisionin për Reformën Zgjedhore, drejtuesi i SPAK-ut, Klodjan Braho, është pyetur nga deputetja Albana Vokshi për çështjen e patronazhistëve dhe kallëzimet e bëra nga PD-ja.  

Braho tha se çështja e patronazhistëve nuk është kompetencë e Prokurorisë së Posaçme, kjo strukturë ka kompetencë vetëm korrupsionin në zgjedhje.

Sa u përket kallëzimeve të bëra nga PD-ja, Braho u shpreh se për secilin prej tyre ka pasur reagim nga SPAK-u dhe në prill të këtij viti opozita është informuar për çdo veprim.

“Patronazhimi nuk është kompetencë e SPAK-ut. SPAK-u ka kompetencë korrupsionin aktiv dhe pasiv në zgjedhje. Sa u përket kallëzimeve të paraqitura nga PD-ja, për secilin prej tyre prokuroria ka pasur një reagim. Jo më vonë se muaji prill i këtij viti ne kemi pasur një korrespondencë ku ju kemi informuar për çdo veprim”, tha Braho.

Kreu i SPAK-ut, Klodjan Braho, ka qenë i pranishëm ditën e sotme në një seancë dëgjimore në Komisionin për Reformën Zgjedhore. Në paraqitjen e bërë, Braho foli për krimet zgjedhore dhe task-forcën e përbashkët me KQZ-në dhe Prokurorinë e Përgjithshme gjatë zgjedhjeve të 2025.

Drejtuesi i SPAK-ut tha se strategjia e vitit 2025 ishte një hap i parë për të kaluar drejt një modeli më të strukturuar dhe më parandalues.

Braho bëri me dije se gjatë vitit aktual janë dënuar 7 persona për veprën penale të krimit zgjedhor. Gjë kjo, për të cilën Braho tha se tregon që hetimi vijon edhe pas periudhës zgjedhore.

Sa i përket task-forcës për zgjedhjet e majit 2025, Braho tha se SPAK, KQZ dhe Prokuroria e Përgjithshme janë në përfundim të raportit të analizës, i cili më pas do t’i përcillet Kuvendit.

Braho deklaroi se lidhur me krimet zgjedhore, SPAK-u synon një qasje më proaktive dhe hetime që duhet të ndjekin edhe gjurmën e parasë.

“Krimi zgjedhor shfaqet me intensitet gjatë periudhave zgjedhore. Përvoja e viteve 2021-2024 shërbeu si bazë për një qasje më të strukturuar në zgjedhjet e vitit 2025. Me synim që reagimi të mos ishte vetëm pas kallëzimeve. Strategjia e vitit 2025 ishte një hap i parë për të kaluar SPAK drejt një modeli më të strukturuar, më parandalues.

Gjatë 2026 janë dënuar 7 persona për veprën krim zgjedhor, që tregon se strategjia vijon edhe pas periudhës zgjedhore.

Lloji i dënimit kryesor i dhënë nga gjykata është me burgim.

SPAK, KQZ dhe Prokuroria e Përgjithshme janë në përfundim të analizës për zgjedhjet e 2025 dhe në përfundim do t’i përcillet Kuvendit. Modeli i 2025 funksionon, por duhet perfeksionuar më tej duke u ndalur te gjurmimi financiar. Krimi zgjedhor nuk është çështje e një institucioni të vetëm, ai kërkon qasje të integruar për parandalim, hetim dhe ndëshkim penal.

SPAK synon të ketë qasje më proaktive në hetimin e krimeve zgjedhore, duke mos u përqendruar vetëm në periudhë zgjedhore. Po ashtu hetimi duhet të ndjekë edhe gjurmën e parasë”, tha Braho.