Nga shokë për kokë në armiq të përbetuar/ Si nisi hasmëria mes Ervis Martinajt dhe Leonard Dukës

2 Gusht 2024, 20:19, Kronika CNA

Nga shokë për kokë në armiq të përbetuar/ Si nisi

Ervis Martinaj dhe Leonard Duka

Ervis Martinaj dhe Leonard Duka, që njihen si armiq të përbetuar, dikur kanë qenë shokë për kokë.

Miqësia e tyre po i ngrinte ata në majat e botës së krimit. Ata kontrollonin së bashku lojërat e fatit dhe trafikun e drogës.

Me zgjerimin e aktivitetit kriminal dhe rritjen e pushtetit, nisën dyshimet për tradhti në biznes.

Sipas raportimeve në media, marrëdhënia e tyre u kris në momentin kur një dërgesë e tyre u kap nga policia.

Martinaj, pasi vërtetoi se Duka e kishte gënjyer, i mori peng babain dhe ia torturoi.

Këtu nisi edhe armiqësia mes dy miqve. “Princi Damian” u betua për hakmarrje së bashku me vëllain e tij Erlis Duka.

Ervis Martinaj dhe Leonard Duka

Ekzekutimet në seri

Fillimisht, ata ekzekutuan ish-policin Santiago Malko në rrugën “Xhanfize Keko” në gusht të vitit 2019 në Tiranë, duke qenë se ai ishte një nga personat më të afërt të bossit të lojërave të fatit. Sipas SPAK-ut, Malko u ekzekutua nga vlonjati Fatmir Hyseni, i njohur si “Doqja” dhe për këtë arsye Martinaj planifikoi më vonë eliminimin e tij.

Vrasja e dytë ndodhi më 30 maj 2020 brenda një hoteli, në aksin Mamurras-Lezhë. Viktima mbetën biznesmeni Bujar Lika dhe Paulin Gjergji, dy miqtë të Martinajt.

Atentati i tretë ndodhi në 13 nëntor 2021, në zonën e Unazës së Re në Tiranë, ku u qëlluan me breshëri brenda makinës Erigers Mihasi dhe Armand Dumani.

Rreth një muaj më vonë, më 23 dhjetor 2021 u ekzekutua brenda makinës një tjetër ushtar i Martinajt. Bëhet fjalë për Can Karriqin, i cili u vra në Kamëz.

Një tjetër atentat ishte ai te mbikalimi i Fushë-Krujës në 17 korrik të vitit 2022. Në këtë raste u vranë Diklen Vata, Besmir Hoxha dhe Brilant Martinaj

Rasti më i fundit ka qenë atentati ndaj financierit të Martinajt, Ylli Brahimit. Mbrëmjen e 22 korrikut 2022, pikërisht në hyrjen kryesore të banesës së Ylli Brahimit apo Brahjas siç njihet ndryshe, pati breshëri armësh, por ai shpëtoi dhe viktimë mbeti Klisman Preçi.

Pak javë më vonë u denoncua edhe zhdukja e Ervis Martinajt. Që prej 9 gushtit të vitit 2022 nuk dihet asgjë për fatin e tij.

Dyshimet për këto krime ranë mbi Klanin Duka, por Martinaj kishte hasmëri edhe me grupe të tjera kriminale./ CNA