Shiti ‘paketë trajtimi’ për COVID-19/ Dënohet me burg mjeku ‘mashtrues’

30 Maj 2022, 21:49, Kosova & Bota CNA

Shiti ‘paketë trajtimi’ për COVID-19/ Dënohet me burg

Dr. Jennings Ryan Staley

Një mjek në Kaliforninë Jugore u dënua në fundjavë, pasi shiti “paketën e trajtimit të COVID-19” gjatë javëve të para të pandemisë së koronavirusit.

Mjeku Jennings Ryan Staley, i cili zotëron "Skinny Beach Med Spa" në San Diego, u dënua me 30 ditë burg dhe një vit arrest shtëpie për përpjekjen për të kontrabanduar medikamentin “Hydroxychloroquine” në SHBA. Ai u përpoq ta shiste këtë medikament si një kurë për COVID-19.

"Në kulmin e pandemisë, përpara se vaksinat të ishin në dispozicion, ky mjek u përpoq të përfitonte nga frika e pacientëve. Ai abuzoi me pozitën e tij të besimit dhe minoi integritetin e të gjithë personelit mjekësor”, tha në deklaratë Randy Grossman, avokati i Shteteve të Bashkuara.

Mediat ndërkombëtare raportojnë se vitin e kaluar, Dr. Staley, u deklarua fajtor për shkeljen e ligjit të importit dhe pranoi se kishte punuar me një furnizues kinez në përpjekje për të kontrabanduar në SHBA një fuçi që ai besonte se përmbante mbi 26 kilogramë pluhur hidroksiklorokinë, duke e etiketuar gabimisht atë si "ekstrakt të gjellës".

Një hetim për 47-vjeçarin filloi dy vjet më parë, pasi agjentët e FBI-së morën informacione rreth fushatës së tij të marketingut.

Në 2020-ën, klinika e tij ofronte paketa me disa medikamente, duke përfshirë “Hidroksilklorinën”, “Azitromicinën” dhe trajtime “kundër ankthit e panikut”.

Në bisedat me një agjent të fshehtë të FBI-së, i cili u paraqit si një klient potencial, Dr. Staley i përshkroi produktet e tij si një kurë "100 për qind", një "plumb magjik", një "armë të mahnitshme" dhe "pothuajse shumë të mira për të qenë të vërteta".

Ai tha se po shiste ilaçe antimalariale që "shëronin sëmundjen" dhe e identifikoi ilaçin si “Hidroksiklorokinë”.

Megjithëse Dr. Staley fillimisht garantoi se trajtimi do të shëronte virusin, ai i tha agjentit të fshehtë në një tjetër telefonatë: “Nuk ka garanci në jetë. Nuk ka garanci për asgjë”.

Përveç dënimit me burg, një gjykatës federal urdhëroi Dr. Staley të paguante një gjobë prej 10,000 dollarësh dhe të kthente 3,995 dollarët e paguar nga agjenti i fshehtë./ B.A. - CNA.al