Serbia zotohet se do të ndjekë penalisht “huliganët” pas marshit të LGBT-së

18 Shtator 2022, 23:00, Kosova & Bota CNA

Serbia zotohet se do të ndjekë penalisht “huliganët”

Protesta në Beograd kundër marshit të komunitetit LGBT

Zyra e Prokurorit në Beograd të Serbisë tha se do të bëjë gjithçka që të identifikojë dhe ndjekë penalisht ata që shkaktuan dhunë gjatë marshit të EuroPride, që zyrtarisht ishte i ndaluar që të mbahej.

Zyra e Prokurorit tha më 18 shtator se do të punojë “për të përcaktuar të gjitha rrethanat e rëndësishme ndaj sulmeve të anëtarëve të Ministrisë së Brendshme... sulmeve dhe kërcënimeve ndaj gazetarëve, por edhe ndaj disa pjesëmarrësve të ngjarjes së EuroPride-it”.

Në deklaratë u tha se autoritetet e drejtësisë do të punojnë me Ministrinë e Brendshme për të identifikuar dhe ndjekur penalisht përgjegjësit për dhunën, dhe disa prej të tyre u cilësuan si “huliganë”.

Ministria e Brendshme serbe më 13 shtator njoftoi zyrtarisht se do të ndalonte mbajtjen e Javës së EuroPride, që kulmon me marshin në rrugët e Beogradit. Të njëjtën masë tha se e ka marrë edhe ndaj protestave të paralajmëruara.

Arsyeja e ndalesës u tha se ishte për shkak të “rrezikut nga dhuna, shkatërrimit të pronës dhe formave të tjera të prishjes së rendit publik në shkallë të gjerë”.

Serbia zotohet se do të ndjekë penalisht “huliganët”

Por, aktivistët e komunitetit LGBT, megjithatë marshuan në rrugët e Beogradit. Në këtë marsh morën pjesë 1.000 aktivistë dhe rreth 6.000 policë u dislokuan për të mbajtur rendin. Gjatë marshit, policia u përlesh me grupet e djathta, që kishin dalë për të kundërshtuar marshin.

Organizatorët e EuroPride-it po ashtu u përballën me kundërshtime të mëdha nga Kisha Ortodokse Serbe.

Më 18 shtator u raportua për disa incidente. Autoritetet thanë se protestuesit kundër marshit të LGBT-së hodhën shishe drejt policisë, duke tentuar që të pengonin ecjen e aktivistëve.

Zyrtarët serbë thanë se 87 persona janë ndaluar, ndërkaq ministri serb i Punëve të Brendshme, Aleksandar Vulin, njoftoi se ndaj 11 prej të ndaluarve janë iniciuar raste penale.

Para mbajtjes së marshit, organizatorët thanë se kishin marrë garanci nga kryeministrja serbe, Ana Bërnabiq – e cila është lezbike – se rrugët e Beogradit do të ishin të sigurta.

Serbia ndalon mbajtjen e Paradës së Krenarisë
13 Shtator, 20:05

Pas marshit, Bërnabiq u tha gazetarëve se “policia bëri punë të mirë”, duke shtuar se ndihet krenare që forcat e rendit arritën të shmangnin “incidente serioze”.

Po ashtu pas marshit, Vulin insistoi se ndalesa për mbajtjen e kësaj ngjarjeje ishte respektuar dhe se personat që ecën në rrugët e Beogradit vetëm “u shoqëruan për në një koncert”.

Ai po ashtu se 13 zyrtarë policorë u lënduan dhe u dëmtuan pesë makina policore gjatë përleshjeve me protestuesit.

EuroPride promovon krenarinë e lesbikeve, homoseksualëve, biseksualëve e transgjinorëve në nivelin panevropian, dhe që nga viti 1992 organizohet nga një qytet i ndryshëm evropian çdo vit./ REL