E fundit!

18:07 Aktualitet

Komisioni i Reformës Zgjedhore kërkon shtyrjen e afatit të punës

Komisioni i Posaçëm i Reformës Zgjedhore ka bërë kërkesë K...

Përgatitje për luftë/ Suedia forcon strehimet bërthamore

11 Prill 2024, 15:25, Kosova & Bota CNA

Suedia

Qeveria e Suedisë njoftoi sot se do të shpenzojë 33 milionë euro për të forcuar strehimoret e saj bërthamore, shërbimet e urgjencës dhe mbrojtjen civile, pasi paralajmëroi se vendi duhet të përgatitet për luftë.

Suedia, e cila u bashkua me NATO-n në fillim të marsit, po investon për të përmirësuar funksionimin e shërbimeve të saj të urgjencës në rast konflikti, për të forcuar sigurinë e saj kibernetike dhe për të rimbushur rezervat e saj të ilaçeve, tha gjatë një konference për shtyp ministri i Mbrojtjes Civile Karl-Oskar Bolin.

Fondet do të përdoren gjithashtu për modernizimin e strehimoreve bërthamore, furnizimit me ujë dhe infrastrukturës së transportit.

"Situata në aspektin e politikës së sigurisë është përkeqësuar prej kohësh," u tha Bolin gazetarëve.

Ministri bëri bujë në janar kur tha në një konferencë të mbrojtjes se "mund të ketë luftë në Suedi". Pak më vonë, kreu i forcave të armatosura suedeze, Mikael Biden, tha se suedezët duhet "të përgatiten mendërisht për luftë".

Suedia kishte shkurtuar shpenzimet e saj ushtarake që nga fundi i Luftës së Ftohtë, por e ndryshoi trendin pasi Rusia aneksoi Krimenë në 2014.

Në mars 2022, pas pushtimit të Ukrainës, Suedia njoftoi se do të rriste më tej këto shpenzime për ta sjellë atë "sa më shpejt të jetë e mundur" në 2% të PBB-së, një objektiv i vendosur nga NATO.

Qeveria njoftoi në fund të vitit 2023 se kjo do të ndodhte në vitin 2024.

Buxheti i mbrojtjes civile të Suedisë arrin në 6.5 miliardë korona (565 milionë euro), sipas agjencisë së lajmeve TT. Agjencia suedeze e urgjencës civile (MSB), e cila është përgjegjëse për koordinimin e përgatitjeve për krizën, po kërkon një buxhet prej 20 miliardë koronash.

Autoritetet suedeze e rikthyen konceptin e "mbrojtjes totale" në vitin 2015 dhe e forcuan këtë përpjekje pas pushtimit të Ukrainës në 2022, duke emëruar një Ministër të Mbrojtjes Civile së bashku me Ministrin e Forcave të Armatosura për të mobilizuar të gjithë shoqërinë.