Paralajmërim për cilësi të dobët të ajrit në pesëmbëdhjetë shtete amerikane

7 Qershor 2023, 18:34, Kosova & Bota CNA

Paralajmërim për cilësi të dobët të ajrit në

NJU JORK – Pesëmbëdhjetë shtete amerikane paralajmëruan banorët të mërkurën për cilësi të dobët të ajrit, ndërsa tymi nga qindra zjarre në pyjet përgjatë Kanadasë lindore zhvendoset drejt jugut, duke krijuar një zbehje të qiellit mbi Nju Jork dhe qytete të tjera të mëdha.

Autoritetet e shëndetësisë në 15 shtete, që nga Vermonti dhe deri në Karolinën e Jugut, si dhe në Ohajo dhe në Kansas, paralajmëruan se grimcat e ngritura në atmosferë mund të tejkalojnë nivelet që konsiderohen të pranueshme dhe mund të vështirësojnë frymëmarrjen për miliona banorë.

Sipas Shërbimit Kombëtar të Motit, paralajmërimi u dha edhe për popullsinë në kryeqytetin Uashington, ku ndodhen zyrat qendrore të Zërit të Amerikës.

Njerëzit u udhëzuan të kufizojnë kohën që kalojnë përjashta, ndërsa personat me probleme në frymëmarrje u këshilluan të mbajnë maskë.

Smogu kalon kufirin amerikan nga Kanadaja, ku sezoni i zjarreve në pyjeve pati një fillim të hershëm të pazakontë dhe me një intensitet të lartë, për shkak të kushteve të vazhdueshme të të nxehtit dhe thatësirës. Kanadaja pritet të ketë kështu sezonin më të keq të zjarreve.

Qielli mbi Nju Jork dhe shumë qytete të tjera mori një ngjyrë të njëtrajtshme gri, dhe ajri mbante erën e drurit të djegur. Në disa qytete, dielli i mëngjesit dukej si një disk i vogël që shkëlqente në ngjyrë portokalli.

Rrokaqiejt e Nju Jorkut, që në një ditë normale mund të shikohen nga distanca prej kilometrash, u bënë pothuajse të padukshëm.

Shkollat e qytetit vazhduan mësimin të mërkurën, megjithëse aktivitetet në mjedise të jashtme, përfshirë edhe një ceremoni mature, u anuluan, u shtynë, apo u transferuan në mjedise të brendshme.

Autoritetet kanadeze qarkulluan të mërkurën një paralajmërim më të fortë për cilësinë e ajrit për banorët e qendrës financiare të vendit, Torontos, për shkak të zjarreve në vazhdim që kanë arritur rekord këtë vit.

Paralajmërim për cilësi të dobët të ajrit në

Zjarret e Kanadasë të para nga sateliti (6 qershor 2023)

Megjithëse zjarret në pyjet kanadezë janë të zakonshme për provincat perëndimore të vendit, sezonin më të keq të zjarreve po e përjeton këtë radhë provinca lindore Nova Scotia. Qeveria kanadeze ka dislokuar ushtrinë në këtë rajon.

Ka vatra zjarri në pothuajse të dhjetë provincat dhe territoret e Kanadasë. Provinca Quebec duket se është më e prekura. Disa nga zjarret u shkaktuan nga rrufetë.

Cilësia e ajrit në kryeqytetin Ottawa, që është pranë kufirit me provincën Quebec, vazhdoi të jetë në kategorinë “e rrezikshmërisë shumë të lartë”, sipas indeksit të shëndetësisë së Kanadasë për Cilësinë e Ajrit.

Rreth 3.3 milionë hektarë pyje janë djegur tashmë – gati 13 herë më shumë se mesatarja e 10 viteve të fundit – dhe mbi 120 mijë njerëz janë detyruar të lënë shtëpitë./ VOA