McCarthy: Negociatorët janë 'më afër një marrëveshjeje' për krizën e borxhit

27 Maj 2023, 22:44, Kosova & Bota CNA

McCarthy: Negociatorët janë 'më afër një

Kryetari i Dhomës së Përfaqësuesve Kevin McCarthy tha të shtunën se negociatorët republikanë ishin “më afër një marrëveshjeje” që do të zgjidhte krizën e borxhit, por se ende nuk kishin arritur një marrëveshje me Presidentin Joe Biden.

Ai tha se ende nuk mund të thotë një afat kohor për të arritur kompromisin përfundimtar që do të rriste kufirin e huamarrjes së vendit dhe do të shmangte një falimentim katastrofik. Negociatorët e Shtëpisë së Bardhë u larguan nga Kapitoli pas orës 2 të mëngjesit dhe u rikthyen disa orë më vonë.

“Do ta kemi marrëveshjen kur ajo të bëhet siç duhet”, tha zoti McCarthy, ndërsa mbërriti në Kongres.

Presidenti Joe Biden gjithashtu tha të premten në mbrëmje se negociatorët kanë përafruar qëndrimet.

Të dyja palët kanë sugjeruar se një nga pengesat kryesore është përpjekja e Partisë Republikane për të shtrënguar parakushtet ekzistuese për ata që marrin ndihma qeveritare, një synim i vjetër republikan që demokratët e kanë kundërshtuar me forcë. Shtëpia e Bardhë tha se propozimet republikane ishin “mizore dhe të pakuptimta”.

Një nga negociatorët republikanë, ligjvënësi i Luizianës, Garret Graves, tha se “nuk kishte asnjë shans” që republikanët të tërhiqeshin për këtë çështje.

Amerikanët dhe bota po ndjekin me ankth negociatat në Uashington që mund ta fusnin ekonominë amerikane në kaos.

Nëse nuk arrihet rritja e kufirit të huamarrjes që tani ka arritur në 31 trilionë dollarë, për të paguar faturat e vendit, kjo do të shkaktonte valë tronditëse në Shtetet e Bashkuara dhe ekonominë globale.

Pensionistët në ankth dhe të tjerë po bënin tashmë plane emergjente për pagesat që kanë frikë se nuk do i marrin. Pagesat e radhës të Sigurimeve Shoqërore priten të kryhen javën e ardhshme.

Presidenti Biden dhe zoti McCarthy duket se po i afrohen një marrëveshjeje dyvjeçare për shkurtimin e buxhetit që do të zgjaste gjithashtu kufirin e borxhit deri në vitin 2025, pas zgjedhjeve të ardhshme presidenciale.

Propozimi republikan për shtrëngimin e kritereve për ata që marrin ndihma nga programe të ndryshme qeveritare do të kursente 11 miliardë dollarë gjatë 10 viteve.

Presidenti Biden fillimisht dukej më i hapur për të negociuar ndryshime të vogla për kuponat e ushqimit falas, programi i njohur si Programi i Ndihmës Shtesë të Ushqyerjes, ose SNAP, por pozicioni i tij është ngurtësuar.

Marrëveshja do të duhet të jetë një kompromis politik në një Kongres të ndarë. Shumë nga republikanët e ekstremit të djathtë, përkrahës në Kongres të ish-Presidentit Donald Trump, kanë qenë prej kohësh skeptikë ndaj parashikimeve të Departamentit të Thesarit dhe ata po i bëjnë presion zotit McCarthy që të mos bëjë lëshime.

Ligjvënësit nuk pritet të kthehen në punë deri të martën, pasi e hëna është festë federale.

Senati që kontrollohet nga demokratët nuk është përfshirë në negociata, duke ia lënë bisedimet Presidentit Biden dhe zotit McCarthy. Udhëheqësi i shumicës në Senat, demokrati Chuck Schumer është zotuar se do të dërgojë një paketë kompromisi në tryezën e Presidentit Biden.

Javët e bisedimeve kanë dështuar të prodhojnë një marrëveshje pjesërisht për shkak se administrata e Presidentit Biden rezistoi për muaj të tërë të negociojë me udhëheqësin republikan të Dhomës së Përfaqësuesve McCarthy, duke argumentuar se borxhet e vendit nuk duhet të përdoren si mjet për prioritete të tjera partiake./VOA