web counter
LEXO PA REKLAMA!

SHKARKO APP

App Store
Google Play

Masakra e Reçakut/ Albin Kurti përkujton viktimat

15 Janar 2024, 10:24, Kosova & Bota CNA
Masakra e Reçakut/ Albin Kurti përkujton viktimat
Kryeministri i Kosovës Albin Kurti

Kryeministri i Kosovës Albin Kurti ka përkujtuar ditën e sotem viktimat e Masakrës së Reçakut.

Gjatë fjalimit të tij, Kurti falenderoi dhe ish shefin e misionit vëzhgues të OSBE-së në Kosovë, ambasadorin William Walker, i cili e quajti masakrën një krim kundër njerëzimit.

 “Masakra e Reçakut këtu e 25 vjet më parë, ku u vranë 45 civilë shqiptarë e tronditi si opinionin publik ndërkombëtar, gjithashtu edhe diplomacinë botërore dhe e bëri të domosdoshëm ndërhyrjen ushtarake të NATO-s për të ndalur gjenocidin e Serbisë në Kosovë. Kur ndodhi masakra e Reçakut, ambasadori William Walker si udhëheqës i misionit të OSBE-së në Kosovë erdhi këtu te fshatarët dhe e foli të vërtetën, tha kjo është masakër dhe krim kundër njerëzimit. E dimë që e vërteta është armiku më i madh i diktatorëve dhe shovinistëve andaj edhe sot e kësaj dite ambasadori William Walker vazhdon të jetë ndërkombëtari më i sulmuar edhe më i urryer në Serbi, ku vazhdon të dominojë një regjim autoritar me ç’rast ish-ministri i informatave të asaj kohe sot është president i Serbisë”, tha Kurti.

Po ashtu në këtë ditë ai përkujtoi dhe 11 ushtarët e UÇK-së të cilët dhanë jetën për të mbrojtur njerëzit në fshat.

 “Më 15 janar në një dimër jashtëzakonisht të ftohtë pati ndodhur ky krim makabër, ndërkaq varrimi i 45 civilëve ka ndodhur vetëm katër javë më vonë sepse ka pasur luftë të madhe për Kosovën. I kemi edhe 11 ushtarë të UÇK-së që kanë rënë në betejë për mbrojtjen e trupave të masakruar nga Serbia dhe ato katër javë tregojnë se Serbia është përpjekur ta deformojë të vërtetën, ta justifikojë krimin dhe prandaj edhe një herë po e theksoj rëndësinë e të vërtetës të ambasadorit William Walker, të cilit i jemi mirënjohës që në një moment historik për popullin tonë e foli vetëm të vërtetën”, tha Kurti./ CNA





Lajmet e fundit nga