Këshilltari i Zelenskit: Sulmi ndaj urës në Kerç u krye nga vetë rusët/ Komplot për rrëzimin e Ministrit të Mbrojtjes, Shoigu

11 Tetor 2022, 08:23, Kosova & Bota Marta Serafini

Këshilltari i Zelenskit: Sulmi ndaj urës në Kerç u krye

“Nuk e goditëm ne urën në Krime, por vetë rusët”. Kishin kaluar vetëm disa minuta që kur u publikuan në internet imazhet e para të urës së dëmtuar në Ngushticën e Kerçit, kur këshilltari i presidentit ukrainas, Mihailo Podoliak i shkroi në "Twitter": “Gjithçka e paligjshme duhet të shkatërrohet, gjithçka e vjedhur duhet t’i rikthehet Ukrainës, gjithçka e pushtuar nga Rusia duhet të çlirohet”.

Pastaj, pasdite, tonet ndryshuan. Përmes një postim të ri po në "Twitter", këshilltari i presidentit ukrainas Volodimir Zelenski foli për një sabotim nga vetë rusët si pasojë e përplasjeve të brendshme. “Për mendimin tonë shpërthimi i së ashtuquajturës Ura e Putinit, është një operacion i brendshëm i njërit prej shërbimeve speciale ruse”- deklaroi ai. Në një intervistë për gazetën italiane “Corriere Della Sera”, Podoliak thotë se dështimet e Rusisë në këtë luftë po nxisin rebelimin e shërbimeve sekrete ndaj Ministrit të Mbrojtjes Sergei Shoigu.

Pra sipas Kievit, ky është një operacion i brendshëm i Moskës?

Po. Javët e fundit, konflikti midis dy qendrave kryesore të pushtetit në Kremlin, Ministrisë ruse të Mbrojtjes dhe FSB-së (shërbimit sekret rus), është përshkallëzuar shumë. Shërbimi Federal i Sigurisë, FSB, po përpiqet përmes rrjetit të saj të figurave publike, përfshirë edhe udhëheqësin çeçen Kadirov të rrëzojë ministrin Sergei Shoigu, si dhe gjeneralët e lartë të ushtrisë ruse. Kontrolli i Urës së Kerçit është zyrtarisht nën juridiksionin e FSB-së. Prandaj ajo u godit nga njësitë e Ministrisë së Mbrojtjes. Për t’ua hedhur fajin shërbimeve sekrete.

Këshilltari i Zelenskit: Sulmi ndaj urës në Kerç u krye

Cilat janë provat ku e mbështetni këtë tezë?

Sipas informacionit nga gjeolokacioni, kamioni që shpërtheu mbi urë po vinte nga territori rus. Dhe vetë automjeti është rus. Sinkronizimi i shpërthimit me kalimin e ngarkesës së karburantit me tren tregon për një planifikim shumë të kujdesshëm të operacionit.

Dhe pse Moska duhet të bombardojë vetë urën më të gjatë që ekziston sot në Europë, që lidh Krimenë me Rusinë?

Javët e fundit kemi parë një dobësimi të qartë të linjës vertikale të komandës ushtarake në Moskë, e cila do të çojë në një shtim të sabotimeve të brendshme. Në territoret e pushtuara do të shtohet paniku dhe bashkë më të edhe përpjekjet për arratisje dhe dezertim. Edhe morali (dhe numri) i trupave pushtuese ruse do të bjerë ndjeshëm.

Por më 18 shtator, ju deklaruat për gazetën tonë se “ura duhet të prishet si një ndërtim i paligjshëm”. A kanë të drejtë ata që flasin për ekzistencën e mosmarrëveshjeve të forta, por edhe tensioneve mes Kievit dhe Uashingtonit lidhur me avancimin e trupave ukrainase drejt Kersonit dhe Krimesë?

Ukraina është shumë skrupuloze për sa i përket respektimit të rregullave të luftës, por edhe në konsultimet që zhvillon periodikisht me aleatët e saj. Kjo nuk do të thotë se ura nuk mund të konsiderohet një objektiv “legjitim”.

Por nuk kemi nevojë të ndërmarrim akte që nuk japin rezultat të drejtpërdrejtë në çlirimin e territoreve. Të gjitha operacionet e këtij lloji - nga vrasja e vajzës së Aleksandër Dugin, te shpërthimet e gazsjellësve “Nord Stream”, dhe tani së fundmi shpërthimi në Urën e Kerçit kanë prapa të njëjtën dorë, atë ruse.

Përkthyer dhe përshtatur nga CNA.al