Gjukanoviç fiton raundin e parë të zgjedhjeve presidenciale

20 Mars 2023, 08:18, Kosova & Bota CNA

Gjukanoviç fiton raundin e parë të zgjedhjeve presidenciale

Foto ilustruese

Pas zgjedhjeve në Malin e Zi, presidenti properëndimor e prej kohësh në pushtet, Milo Gjukanoviç, sipas të dhënave paraprake ka fituar 35% të votave. Në balotazh Gjukanoviç del me ekonomistin Jakov Milatoviç.

Në mesin e krizës politike të vendit, Mali i Zi votoi për presidentin e ri. Sipas Institutit për Studimet Zgjedhore, CTD presidenti aktual properëndimor, Milo Gjukanoviç, ka fituar 35% të votave. Për raundin e balotazhit Gjukanoviç duhet të përballet me ekonomistin Jakov Milatoviç, i cili u rendit i dyti sipas rezultateve paraprake me 29% të votave.

Partia e tij "Europa tani" është e afërt me kishën ortodoske serbe të komanduar nga Beogradi. Në vendin e tretë u rendit kreu i Frontit Demokratik, parti e hapur proserbe, Andrija Mandiç, me 19 të votave. Zgjedhjet e balotazhit zhvillohen më 2 prill. Këto zgjedhje vendosin për fatin politik të Gjukanoviçit.

Në Malin e Zi 540.000 votues u thirrën të dielën të votojnë për presidentin e ri të vendit. Zgjedhjet u zhvilluan në një klimë të ndezur politike. Presidenti aktual, Gjukanoviç, këtë herë ka konkurrencë të fortë. Jakov Milatoviç, një ekonomist proeuropian, ka dalë në garë kundër properëndimorit Gjukanoviç. Milatoviç, politikan i ri, shihet me shanse të mira për zgjedhjet e balotazhit. Partia e tij "Europa tani" paraqitet si parti moderne dhe e orientuar nga reformat. Milatoviç ka qenë ministër i Ekonomisë në qeverinë proserbe jetëshkurtër (dhjetor 2020-prill 2022).

Andrija Mandiç, i cili kërkon një afrim më të madh të vendit anëtar të NATO-s me Serbinë fqinje dhe Rusinë u rendit i treti.

Gjukanoviç akuzohet për korrupsion

61-vjeçari, Milo Gjukanoviç, që prej 33 vjetësh mban poste drejtuese në Malin e Zi, akuzohet nga kundërshtarët e tij politikë për korrupsion ashtu si edhe partia e tij e qendrës së majtë, DPS. Gjukanoviç dhe partia e tij nuk i pranojnë akuzat. Mali i Zi ndodhet prej muajsh në një krizë të thellë politike. Disa herë ka pasur votë mosbesimi në parlament dhe përplasje politike mes presidentit dhe deputetëve. Të enjten Gjukanoviç vendosi të shpërbëjë parlamentin dhe caktoi datën e zgjedhjeve të reja parlamentare më 11 qershor. Rezultati i zgjedhjeve presidenciale mund të ndikojë edhe në zgjedhjet parlamentare./ DW