E fundit!

12:34 Aktualitet

Kërkesa e protestuesve për kufizimin e mandatit të kryeministrit/ Berisha: PD e gatshme ta votojë

Kreu i PD-së, Sali Berisha, deklaroi se Partia Demokratike...

Bomba thërrmuese nga SHBA / Shtetet pro dhe kundër këtij vendimi

9 Korrik 2023, 20:00, Kosova & Bota CNA

Disa aleatë të SHBA-së kanë shprehur shqetësim për vendimin e Uashingtonit për të furnizuar Ukrainën me bomba thërrmuese.

Të premten, SHBA konfirmoi se po dërgonte armët e shumëdiskutuara në Ukrainë, vendim I presidentit Joe Biden që e quajti atë një "vendim shumë të vështirë".

Britania e Madhe, Kanadaja, Zelanda e Re dhe Spanja thanë se ishin kundër përdorimit të armëve.

Bombat thërrmuese janë ndaluar nga më shumë se 100 vende për shkak të rrezikut që ato paraqesin për civilët.

Ato zakonisht lëshojnë shumë bomba më të vogla që mund të vrasin në një zonë të gjerë.

Pse SHBA po i jep Ukrainës armë të tilla?

Biden tha për CNN se ai kishte folur më parë me aleatët për vendimin, i cili ishte pjesë e një pakete ndihme ushtarake me vlerë 800 milionë dollarë.

Vendimi u kritikua shpejt nga grupet e të drejtave të njeriut duke thënë se municionet thërrmuese përbëjnë "një kërcënim të madh për jetën e civilëve, edhe shumë kohë pasi konflikti të ketë përfunduar".

Kryeministri i Mbretërisë së Bashkuar Rishi Sunak theksoi se Britania e Madhe ishte një nga 123 vendet që kishin nënshkruar Konventën për Municionet Thërrmuese, e cila ndalon prodhimin ose përdorimin e armëve dhe dekurajon përdorimin e tyre.

Ministrja e Mbrojtjes e Spanjës Margarita Robles u tha gazetarëve se Spanja ka mbajtur një qëndrim të palëkundur se disa armë dhe bomba nuk mund të dërgoheshin në Ukrainë.

"Jo bombave thërrmuese dhe po mbrojtjes legjitime të Ukrainës, e cila ne e kuptojmë se nuk duhet të kryhet me bomba thërrmuese," tha ajo.

Qeveria kanadeze tha se ishte veçanërisht e shqetësuar për ndikimin e mundshëm të bombave - të cilat ndonjëherë qëndrojnë të pashpërthyera për shumë vite.

Gjermania shprehet se megjithëse nuk do t'i jepte armë të tilla Ukrainës, ajo e kuptonte qëndrimin amerikan.

"Ne jemi të sigurt se miqtë tanë amerikanë nuk e morën vendimin për furnizimin e një municioni të tillë lehtë," u tha gazetarëve në Berlin zëdhënësi i qeverisë gjermane Steffen Hebestreit.

Ministri i mbrojtjes i Ukrainës ka dhënë garanci se bombat thërrmuese do të përdoren vetëm për të thyer linjat e mbrojtjes së armikut, dhe jo në zonat urbane.

Koalicioni amerikan i municioneve thërrmuese, i cili është pjesë e një fushate ndërkombëtare të shoqërisë civile që punon për çrrënjosjen e armëve, tha se ato do të shkaktonin "vuajtje më të mëdha, sot dhe për dekadat në vijim".

Zyra e OKB-së për të drejtat e njeriut ka qenë gjithashtu kritike, duke u shprehur se "përdorimi i municioneve të tilla duhet të ndalet menjëherë dhe të mos përdoret në asnjë vend".

Zëdhënësja e Ministrisë së Jashtme të Rusisë, Maria Zakharova tha gjithashtu se garancitë e Ukrainës se do t'i përdorte municionet thërrmuese me përgjegjësi nuk vlejnë..

Presidenti ukrainas Volodymyr Zelensky falënderoi presidentin amerikan për "një paketë ndihme ushtarake në kohë, të gjerë dhe shumë të nevojshme".

Gjenerali Sir Richard Shirreff, një ish-zëvendës komandant i NATO-s në Evropë, ka mbështetur këtë vednim të SHBA-ve duke thënë se vendosja e tyre duhet ta bëjë më të lehtë për Ukrainën të depërtojë në linjat ruse.

Nëse Perëndimi do të kishte siguruar më shumë armë më herët, tha ai, atëherë nuk do të kishte pasur nevojë të siguronte këtë armë tani./ CNA