Situata në veri/ QKMK: Rënie e hyrjeve në pikën kufitare në Merdar, ngritje në Morinë

9 Korrik 2023, 14:58, Kosova & Bota CNA

Situata në veri/ QKMK: Rënie e hyrjeve në pikën kufitare

Të dhënat e fundit nga Qendra për Menaxhim Kufitar në Kosovë pasqyrojnë se se ka një rënie të ndjeshme të hyrjeve në pikat kufitare tokësore të Kosovës.

Shkak i kësaj rënieje të frekuentimit të pikave kufitare tokësore ka qenë situata në veri të Kosovës e cila ka krijuar një pasiguri për të gjithë ata që shkojnë drejt Kosovës përmes pikave kufitare të Serbisë.

Qendra Kombëtare për Menaxhim Kufitar është shprehur sse hyrjet për në Kosovë janë shtuar më shumë në pikëkalimin në Morinë dhe pikëkalimi në Merdar, ka shënuar dukshëm rënie.

Bazuar në statistikat e tyre duket se nga data 01.06.2023-deri më 03.07.2023 në Kosovë kanë hyrë 591 mijë e 636 persona. Kjo është një rënie krahasuar në datat e njëjta të vitit 2022, ku përmes pikave kufitare tokësore në Kosovë kanë hyrë mbi 740 mijë persona.

Rexhë Islamaj një shqiptar i Kosovës që jeton në Zvicër shprehet se për shkak të situatës në vend dhe thirrjes së qeverisë për shmangie të pikës kufitare në Merdar, ka ardhur në Kosovë përmes rrugës Kroaci, Mal të Zi e Shqipëri.

“E kam ndërruar për shkak që qeveria ka kërkuar, dhe një shok me mua ka qenë me dokumente të Kosovës, dhe nuk kemi dashur që t’i biem andej për shumë arsye. Kam ardhur nëpër Kroaci, kemi kaluar shumë mirë. Rruga ishte shkurtuar për 100 km, dhe kemi hyrë në Mal të Zi direkt dhe pa telashe. Kemi ardhur gjithmonë për Merdar ose te Dheu i Bardhë, e tani kthimin do ta bëjmë nga Durrësi për në Itali, me traget”,- shprehet një shqiptar.

Fatmir Syla, një tjetër shqiptar i Kosovës që ka vite që jeton në Gjermani me familjen e tij shprehet se nuk kalon nga Merdari asnjëherë për shkaqe sigurie.

“Nga Gjermania kam ardhur me 26, nga Kroacia-Slloveni – Kroaci, Mal të Zi, Shqipëri, e preferoj gjithmonë këtë rrugë për shkak të sigurisë. Kam pasur frikë se do të ketë më fluks për arsye se për Serbi kanë bërë thirrje me u shmang, por ka qenë gjithçka në rregull edhe pa tollovi, përveç në Mal të Zi që kemi pritur 10 minuta përndryshe udhëtimi ka qenë pa probleme dhe shumë mirë kemi kaluar. Unë për Merdar nuk udhëtoj kurrë, për shkak të sigurisë”, tha Syla.

Qeveria e Kosovës i ka bërë thirrje diasporës kosovare që të shmangin pikëkalimin kufitar nëpërmjet Serbisë, për shkak të situatës së krijuar në veri të vendit, për të shmangur çfarëdo incidenti.