"Bisedimet bërthamore me Iranin duhet të vazhdojnë"/ Trump dhe Netanyahu takim në Shtëpinë e Bardhë

11 Shkurt 2026, 22:42, Kosova & Bota CNA

"Bisedimet bërthamore me Iranin duhet të vazhdojnë"/

Presidenti i SHBA-së, Donald Trump ka zhvilluar ditën e sotme një takim me kryeministrin izraelit, Benjamin Netanyahu në Shtëpinë e Bardhë.

Takimi që raportohet se zgjati rreth tre orë ka përfunduar pa u arritur një dakordësi lidhur me negociatat bërthamore me Iranin. Në një reagim në Truth Social, Trump tha se në takim u diskutua edhe për Gazën dhe rajonin e Lindjes së Mesme në përgjithësi.

“Sapo kam mbaruar takimin me Kryeministrin Netanyahu të Izraelit dhe disa përfaqësues të tij. Ishte një takim shumë i mirë, marrëdhënia e shkëlqyer midis dy vendeve tona vazhdon. Nuk u arrit asgjë përfundimtare përveçse këmbëngula që negociatat me Iranin të vazhdojnë për të parë nëse mund të arrihet apo jo një marrëveshje. Nëse mundet, ia bëj të ditur Kryeministrit se kjo do të jetë një preferencë. Nëse nuk mundet, do të duhet të shohim se cili do të jetë rezultati. Herën e fundit, Irani vendosi se ishte më mirë të mos arrinte një marrëveshje dhe u godit me "Çekiçin e Mesnatës" - kjo nuk funksionoi mirë për ta. Shpresojmë që këtë herë të jenë më të arsyeshëm dhe të përgjegjshëm. Përveç kësaj, diskutuam për progresin e jashtëzakonshëm që po bëhet në Gaza dhe në rajon në përgjithësi. Vërtet ka PAQE në Lindjen e Mesme. Faleminderit për vëmendjen tuaj ndaj kësaj çështjeje”, thuhet në reagimin e Trump.

Të dy udhëheqësit u takuan në Shtëpinë e Bardhë, ndërsa tensionet vazhdojnë të rriten në të gjithë Lindjen e Mesme dhe negociatat intensifikohen mbi frenimin e programit të armëve bërthamore të Iranit. Irani ka sugjeruar se është gati të kufizojë programin e tij bërthamor në këmbim të lehtësimit të sanksioneve, por ka hedhur poshtë kërkesat e tjera.

Përpara takimit në Shtëpinë e Bardhë, Presidenti iranian Masoud Pezeshkian paralajmëroi se vendi i tij nuk do t'u nënshtrohej kërkesave të tepërta. Vizita e Netanyahut shënon udhëtimin e tij të gjashtë në SHBA që nga rikthimi i Trump në detyrë, më shumë se çdo udhëheqës tjetër botëror.

Zyra e Netanyahut dha gjithashtu detaje për takimin ku tha se udhëheqësit kishin diskutuar nevojat e sigurisë së Shtetit të Izraelit në kontekstin e negociatave dhe ranë dakord të vazhdojnë koordinimin dhe marrëdhënien e tyre të ngushtë. Një aleat i ngushtë i Trump, Netanyahu ka argumentuar prej kohësh se Irani përfaqëson një kërcënim ekzistencial për sigurinë e Izraelit dhe i ka shtyrë SHBA-të të frenojnë ndikimin e Teheranit në rajon.

“Kryeministri beson se çdo negociatë duhet të përfshijë kufizimin e raketave balistike dhe ndërprerjen e mbështetjes për boshtin iranian”, tha zyra e Netanyahut në një deklaratë përpara udhëtimit të tij.

Pasi mbërriti në Uashington të martën, Netanyahu u takua me të dërguarin special të Trump, Steve Ëitkoff, dhe dhëndrin e tij, Jared Kushner. Sipas zyrës së kryeministrit, dyshja ofroi një përditësim mbi raundin e parë të negociatave që zhvilluan me Iranin të premten e kaluar.

Vizita e Netanyahut vjen në një kohë kur SHBA-të rrisin praninë e tyre ushtarake në Lindjen e Mesme, me Trump që e paralajmëron Teheranin për sulme nëse nuk arrin një marrëveshje për programin e tij bërthamor dhe nuk ndalon vrasjen e protestuesve. /CNA