Arabia Saudite dhe Pakistani nënshkruajnë pakt mbrojtjeje të ndërsjellë

19 Shtator 2025, 12:18, Kosova & Bota CNA

Arabia Saudite dhe Pakistani nënshkruajnë pakt mbrojtjeje të

Arabia Saudite dhe Pakistani, shtet i armatosur me armë bërthamore, të mërkurën nënshkruan një pakt formal të mbrojtjes së ndërsjellë, veprim ky që forcon ndjeshëm një partneritet sigurie prej dekadash, teksa vazhdojnë tensionet e larta rajonale.

Ky pakt nënshkruhet në një kohë që shtetet arabe të Gjirit po bëhen gjithnjë e më të kujdesshme në lidhje me besueshmërinë e Shteteve të Bashkuara si garantues i tyre i hershëm i sigurisë. Sulmi i Izraelit ndaj Katarit javën që shkoi i rriti këto shqetësime.

"Marrëveshja është një kulmim i viteve të diskutimeve. Kjo nuk është një përgjigje ndaj vendeve specifike ose ngjarjeve specifike, por një institucionalizim i bashkëpunimit të gjatë dhe të thellë midis dy vendeve tona", tha një zyrtar i lartë saudit për Reuters kur u pyet se pse marrëveshja u nënkshrua pikërisht në këtë kohë.

Sulmet ajrore të Izraelit në Doha, për të vrarë udhëheqësit politikë të Hamasit, ndërsa ata po diskutonin një propozim armëpushimi që Katari po ndihmon të ndërmjetësojë, i zemëroi shumë vendet arabe.

Pakti mund të ndryshojë llogaritjet strategjike në një rajon kompleks. Aleatët e Uashingtonit dhe monarkitë e Gjirit kanë kërkuar të stabilizojnë lidhjet me Iranin, po ashtu edhe me Izraelin, në mënyrë që të zgjidhen shqetësimet e sigurisë që ekzistojnë prej kohësh.

Por lufta në Gaza ka tronditur rajonin dhe Katari është goditur drejtpërdrejt dy herë në vit, një herë nga Irani dhe një herë nga Izraeli.

Marrëveshja saudite vjen muaj pasi Pakistani zhvilloi një konflikt të shkurtër ushtarak në maj me shtetin rival, Indinë.

Zëdhënësi i Ministrisë së Punëve të Jashtme të Indisë, Randhir Jaiswal, tha në një postim në X të enjten se India ishte në dijeni të zhvillimit, duke shtuar se do të studionte këto implikime për sigurinë e New Delhit dhe për stabilitetin rajonal.

Zyrtari i lartë saudit, duke ruajtur anonimatin, pranoi nevojën për të balancuar marrëdhëniet me rivalin e Pakistanit, Indinë, që gjithashtu është një fuqi bërthamore.

"Marrëdhënia jonë me Indinë është më e fortë se kurrë. Ne do të vazhdojmë ta zhvillojmë këtë marrëdhënie dhe do të përpiqemi të kontribuojmë në paqen rajonale në çfarëdo mënyre që të mundemi."

I pyetur nëse Pakistani do të ishte i detyruar t'i siguronte Arabisë Saudite një ombrellë bërthamore sipas paktit, zyrtari tha: "Kjo është një marrëveshje gjithëpërfshirëse mbrojtëse që përfshin të gjitha mjetet ushtarake."

Televizioni shtetëror pakistanez shfaqi pamje që tregojnë kryeministrin pakistanez Shehbaz Sharif dhe princin e kurorës saudite Mohammed bin Salman, që është edhe sundimtari de facto i mbretërisë, duke u përqafuar pas nënshkrimit të marrëveshjes. I pranishëm ishte shefi i ushtrisë së Pakistanit, Feldmarshal Asim Munir, i konsideruar si personi më i fuqishëm i vendit.

"Kjo marrëveshje, e cila pasqyron angazhimin e përbashkët të të dy kombeve për të rritur sigurinë e tyre dhe për të arritur sigurinë dhe paqen në rajon dhe në botë, synon të zhvillojë aspekte të bashkëpunimit mbrojtës midis dy vendeve dhe të forcojë parandalimin e përbashkët kundër çdo agresioni. Marrëveshja thotë se çdo agresion kundër njërit prej vendeve do të konsiderohet një agresion kundër të dyve", u tha në deklaratën nga zyra e kryeministrit pakistanez./ CNA