E fundit!

09:11 Aktualitet

Një hap më pranë Brukselit/ Gjermania përshëndet progresin e Shqipërisë në negociatat me BE

Ambasada Gjermane në Tiranë ka përshëndetur mbylljen e për...

Sa kursejnë evropianët? Eurostat: Gjermania kampione, grekët marrin borxh

27 Nëntor 2023, 11:37, Ekonomi CNA

Sa kursejnë evropianët? Eurostat: Gjermania kampione, grekët

Foto ilustruese

Eurostat ka publikuar një raport në lidhje me kursimet e evropianëve për vitin që lamë pas.

Sipas të dhënave të Eurostat, rezulton se familjet evropiane kanë kursyer 1/8 e të ardhurave të tyre.

"EuronewsBusiness" shkruan se në vitin 2022, familjet në BE kursyen mesatarisht 12.7% të të ardhurave të tyre të disponueshme, ndërsa norma për eurozonën ishte më e lartë, në 13.7%.

Të ardhurat e disponueshme të familjeve janë ato që familjet kanë në dispozicion për të shpenzuar dhe kursyer pas taksave dhe transfertave, siç përcaktohet nga Eurostat.

"Nëse familjet fitojnë 100 €, ata shpenzojnë 78.30 € dhe mbeten me 12.70 € për të shpenzuar. Është një shifër normale. Shumica e vendeve në BE kanë një normë kursimi familjar midis 10% dhe 15%,"- shpjegoi kryeekonomisti në Astères, Sylvain Bersinger.

Krahasuar me SHBA-në, evropianët kursejnë më tepër pasi norma e kursimit të amerikanëve kap vlerën e 3.4% të të ardhurave.

Gjermania është kampione e Evropës

Në BE, Gjermania arriti në vendin e parë të podiumit me normën më të lartë të kursimeve bruto 19.91%, Holanda fitoi medaljen e argjendtë 19.44% dhe Luksemburgu të bronzit 18.14%.

Ndërkohë dy janë vendet që kanë norma negative kursimi duke shpenzuar më shumë sesa fitojnë dhe bëhet fjalë për Poloninë dhe Greqinë, ku qytetarët marrin hua ose përdorin kursimet për të financuar konsumin e tyre.

12 anëtarë të BE-së regjistruan norma kursimi nën 10.0% në vitin 2022, ndër të cilat Polonia dhe Greqia kishin norma negative, respektivisht -0.8% dhe -4.0%.

Normat e kursimit midis vendeve ndryshojnë masivisht, po aq sa në familje.

Pasuria është sigurisht një faktor për të llogaritur pabarazitë sistematike në normat e kursimit të familjeve. "Ne shohim se vendet me nivele më të ulëta të të ardhurave po luftojnë për të përmbushur nevojat e tyre dhe për këtë arsye janë në gjendje të kursejnë shumë pak," vuri në dukje kryeekonomisti në Astères, Desringer.

Është gjithashtu rasti i Greqisë, e cila ka përjetuar vështirësi të mëdha ekonomike dhe ka vendosur një sërë masash shtrënguese, duke ulur të ardhurat e disponueshme të familjeve.

"Norma negative e kursimeve tregon se grekët nuk kanë dalë ende nga kriza. Nga ana tjetër, vendet me më shumë kursime priren të jenë më të pasura," - tha Desringer.

Gjermanët kanë kursyer vazhdimisht më shumë se 8% të të ardhurave të tyre të disponueshme gjatë dy dekadave të fundit, sipas të dhënave të OECD.

Megjithatë, Luigi Guiso gjen kufizime për këtë shpjegim. "Dallimet midis Gjermanisë dhe Greqisë nuk ekzistojnë sepse grekëve u pëlqen të shpenzojnë gjithçka dhe gjermanëve jo. Normat gjermane të kursimeve kanë qenë të ulëta 20 vjet më parë. Të rinjtë priren të kursejnë më shumë sesa pensionistët që kanë një fluks më të ulët të ardhurash," - shpjegoi Guiso.

Një rikthim në nivelet para pandemisë

Evropianët kursyen më pak në 2022 sesa në 2021, duke lejuar që konsumi familjar të zgjerohet më tej me kthimin e normës së familjeve në nivelet e saj para pandemisë.

Shkalla e kursimeve të familjeve në BE po kthehet në nivelet para pandemisë, thonë ekspertët.

Ndërkohë, viti 2022 shënoi një fazë rimëkëmbjeje ekonomike, gjë që shpjegon normën më të ulët të kursimit në krahasim me një vit më parë.

Megjithatë, goditjet e njëpasnjëshme pas pandemisë, duke përfshirë pushtimin e Ukrainës nga Rusia dhe rritjen e kostove të jetesës, kanë ndërprerë gjithashtu sjelljen e kursimeve të familjeve. Një faktor tjetër që motivon evropianët të kursejnë në vend që të shpenzojnë është rritja e normave të interesit./CNA