Hyrja në SEPA, transfertat ndërkombëtare në nisje u rritën me gati 29% për tremujorin e parë

8 Qershor 2026, 14:53, Ekonomi CNA

Hyrja në SEPA, transfertat ndërkombëtare në nisje u

Transfertat ndërkombëtare të nisura nëpërmjet sektorit bankar kanë shënuar rritje të ndjeshme në tremujorin e parë të këtij viti.

Sipas statistikave të Bankës së Shqipërisë, klientët e sektorit bankar shqiptar nisën 1 milion e 51 mijë transferta jashtë vendit, me një rritje prej 28.5% krahasuar me një vit më parë.

Rritja ishte e ngjashme si te klientët individë, ashtu edhe te bizneset.

Për tre muajt e parë të vitit, individët nisën pothuajse 893 mijë transferta jashtë vendit, 29% më shumë krahasuar me tremujorin e parë të vitit të kaluar.

Ndërsa bizneset nisën 159 mijë transferta, 24% më shumë krahasuar me të njëjtën periudhë të një viti më parë.

Rritja e transfertave ndërkombëtare ishte e dukshme edhe në vlerë. Statistikat tregojnë se shuma e transfertave ndërkombëtare të nisura nga klientët e sektorit bankar shqiptar arriti në 280.6 miliardë lekë, në rritje me 12.5% krahasuar me një vit më parë.

Përveç zgjerimit të veprimtarisë ekonomike dhe rritjes së përfshirjes financiare, rritja e transfertave ndërkombëtare mund të shpjegohet edhe me efektet e përfshirjes në Zonën e Vetme të Pagesave në Euro (SEPA), duke filluar nga tetori i vitit të kaluar.

Kjo ka sjellë një ulje të ndjeshme të komisioneve të transfertave ndërkombëtare për publikun shqiptar. Sipas rregullores së miratuar nga Banka e Shqipërisë, nivelet maksimale të parashikuara për komisionet e transfertave të brendshme do të jenë të vlefshme edhe për transfertat ndërkombëtare nëpërmjet SEPA.

Komisioni minimal që bankat mund të aplikojnë për transfertat kombëtare në monedhën europiane, të kryera nëpërmjet e-banking, nuk mund të jetë më i lartë se 2 euro.

Ndërsa totali i komisioneve për çdo transfertë me vlerë deri në 100 mijë euro, të kryer me e-banking, nuk mund të jetë më i lartë se 0.01% e vlerës së transferuar. E thënë ndryshe, për shumën maksimale të këtij tavani, 100 mijë euro, komisioni për pagesat elektronike do të jetë maksimalisht 10 euro. Ndërkohë, totali i komisioneve për çdo transfertë me vlerë deri në 100 mijë euro, e kryer në degë (në formë letër) nuk mund të jetë më i lartë se 0.02% e vlerës së transferuar.

Komisionet maksimale që bankat mund të aplikojnë (për transfertat mbi 100 mijë euro), pavarësisht shumës së transfertës, janë 50 euro për transfertat e kryera në degë dhe 25 euro për ato të nisura nëpërmjet kanaleve elektronike.

Shqipëria u pranua zyrtarisht si anëtare e zonës SEPA nga Këshilli Europian i Pagesave në 21 nëntor 2024. Më parë, sektori bankar në Shqipëri i ekzekutonte transfertat ndërkombëtare nëpërmjet nëpërmjet bankave të huaja korrespondente. Një zgjidhje e tillë sillte komisione të larta dhe kohë relativisht të gjatë për kryerjen e transfertave./ Monitor