Kostot e ndërtimit në banesa/ Rritje vjetore 1,1% në 3-mujorin e parë

4 Qershor 2026, 14:19, Ekonomi CNA

Kostot e ndërtimit në banesa/ Rritje vjetore 1,1% në 3-mujorin e

Marzhet e fitimeve në sektorin e ndërtimit janë rritur ndjeshëm vitet e fundit për shkak se kostot janë rritur me ritme shumë më të ulëta se çmimet.

Të dhënat e sotme të INSTAT tregojnë se Indeksi i Kushtimit në Ndërtim në tremujorin e parë 2026 pësoi rritje vjetore, është 1,1%, një vit më parë ky ndryshim ishte 1,0%.

Krahasuar me të njëjtin tremujor të një viti më parë, rritja më e madhe e çmimeve vërehet në grupin “Shpenzime për paga” me 4,8%, pasuar nga grupi “Kosto të tjera” me 2,5%, “Shpenzime transporti” me 1,7% dhe grupi “Shpenzime makinerie” me 1,5%.

Nga ana tjetër grupi “Shpenzime materiale” shënoi ulje me 0,9%. Brenda grupit “Shpenzime materiale”, indeksi i nëngrupit “Materiale ndërtimi” shënoi ulje me 1,4%, pasuar nga nëngrupi “Materiale hidro-sanitare dhe ventilimi” me 0,9%.

Nga ana tjetër grupi “Materiale elektrike dhe komunikimi” shënoi rritje me 0,5%.

Indeksi i Kushtimit në Ndërtim shënoi rritje me 0,3%, krahasuar me tremujorin e katërt të vitit 2025.

Rritja më e madhe e çmimeve vërehet në grupin “Kosto të tjera’’ me 1,7%, grupi “Shpenzime për paga” me 0,6%, grupi “Shpenzime makinerie” me 0,3% dhe grupi “Shpenzime transporti” me 0,3%.

Nga ana tjetër, grupi “Shpenzime materiale” ka shënuar ulje me 0,2%. Brenda këtij grupi, ulje patën nëngrupet “Materiale hidro-sanitare dhe ventilimi’’ me 0,8% dhe nëngrupi “Materiale ndërtimi” me 0,4%. Nga ana tjetër nëngrupi “Materiale elektrike dhe komunikimi” shënoi rritje me 0,2%.

Sektori i ndërtimit është zgjeruar ndjeshëm vitet e fundit me ndërtime shumëkatëshe në Tiranë dhe resorte dhe hotele në bregdet. Kërkesa në rritje ka bërë që shumë bizneset nga sektorë të tjerë të zhvendosen në ndërtim.

Indeksi i Kushtimit në Ndërtim për Banesa (IKN) duke filluar nga tremujori i parë 2024 do të llogaritet me bazën e re. Tremujori i katërt 2021 shërben si periudhë bazë për llogaritjen e indeksit (tremujori i katërt 2021 = 100).

IKN mat ecurinë e çmimeve të materialeve të ndërtimit, të fuqisë punëtore dhe të shpenzimeve të tjera kapitale që përdoren në ndërtimin e një banese tip (8 – 10 kate). Shporta e re përbëhet nga 71 zëra nga të cilat 66 janë materiale ndërtimi.

Çmimet për materialet e ndërtimit mblidhen nga 237 distributorë dhe shitës me shumicë të materialeve të ndërtimit. Ndërsa, të dhënat për shpenzimet për pagat, makineritë dhe transportin merren nga 97 ndërmarrje të mëdha ndërtimi të përqendruara kryesisht në rrethin e Tiranës./Monitor