web counter
LEXO PA REKLAMA!

SHKARKO APP

App Store
Google Play

E fundit!

x

Projektues të papërgjegjshëm dhe pasoja të rënda/ Rruga Qukës-Qafë Plloçë, si simbol i paaftësisë profesionale

18 Janar 2026, 10:08, Denoncim CNA

Rruga Qukës-Qafë Plloçë është një nga projektet më problematike infrastrukturore në vend dhe një dëshmi e qartë e papërgjegjshmërisë dhe paaftësisë profesionale të atyre që kanë hartuar këtë vepër. Bllokimet e përsëritura dhe rrëshqitjet e dherave që përfshijnë aksin janë pasojë jo e kushteve natyrore, por e një projektimi të gabuar dhe të papërgjegjshëm.

Ky projekt u hartua para vitit 2009, dhe është realizuar pa standardet minimale dhe pa një studim të thelluar topografik, gjeologjik dhe gjeoteknik. Projektuesit e kësaj rruge kanë injoruar faktin që aksi ngjitet në një lartësi mbi 1200 metra, në një zonë me kushte klimatike ekstreme, ngrica të zgjatura dhe cikle të shpeshta ngrirje–shkrirje. Këta faktorë kërkojnë një ekspertizë të lartë dhe zgjidhje të avancuara teknike, të cilat nuk janë marrë parasysh.

Projektues të papërgjegjshëm dhe pasoja të rënda/ Rruga

Një tjetër problem i dukshëm është segmenti i ndërtuar në shpat mali, që nuk merr rreze dielli për muaj të tërë. Kjo bën që këto pjesë të rrugës të mbeten vazhdimisht të ngrira, duke dëmtuar strukturën dhe duke rritur rrezikun e aksidenteve. Ky është një element mikroklimatik i rëndësishëm, i cili, ose nuk është marrë parasysh fare, ose është shpërfillur qëllimisht.

Kulmi i paaftësisë profesionale qëndron në vendimin për të zhvendosur aksin rrugor në një distancë 10 kilometra më tej në një zonë me probleme gjeologjike të njohura, vetëm për të ofruar një pamje panoramike. Për hir të estetikës, janë bërë gërmime shumë të thella dhe të rrezikshme, që kanë prishur ekuilibrin natyror të shpatit. Ky është një shembull tjetër i shpërfilljes së sigurisë dhe të pasojave afatgjata që kanë këto vendime.

Një logjikë e ngjashme është përdorur edhe në projektin e Bajpasit të Vlorës, ku po ashtu problemet kanë vazhduar për vite dhe kostoja e rrugës është dyfishuar.

Këto raste tregojnë një realitet të hidhur: për projekte kaq komplekse nuk mjafton improvizimi dhe kursimi në fazën e projektimit. Është shumë më e arsyeshme dhe më e sigurt të angazhohen studio dhe projektues ndërkombëtarë, të cilët kanë eksperiencën dhe njohuritë e nevojshme për të realizuar projekte në terrene të tilla malore, pavarësisht kostos më të lartë. Kostoja e një projekti të mirë është gjithmonë më e ulët se kostoja e një projekti të keq.

Projektues të papërgjegjshëm dhe pasoja të rënda/ Rruga

Sot, qytetarët po paguajnë shumëfish për dështime të tilla, që përfshijnë humbje ekonomike, kosto të larta mirëmbajtjeje, dhe rrezik për jetën, vetëm sepse projekti fillestar është realizuar nga njerëz të papërgatitur.

Rruga Qukës–Qafë Plloçë duhet të shërbejë si një shembull i qartë se papërgjegjshmëria profesionale dhe mungesa e llogaridhënies në projektim çojnë në vepra infrastrukturore të pasigurta, të cilat kërcënojnë drejtpërdrejt jetën e qytetarëve. Pa standarde të larta, ekspertizë reale dhe ndëshkim për dështimet, infrastruktura publike do të vazhdojë të ndërtohet mbi gabime të shtrenjta dhe të rrezikshme./CNA 





Lajmet e fundit nga