E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Foto-Skandali/ Makina e deputetit socialist karikohet në institucionin ku ka qenë drejtor

3 Tetor 2025, 14:58, Denoncim CNA

Foto-Skandali/ Makina e deputetit socialist karikohet në institucionin ku

Makina e deputetit socialist, Ardit Bido, i zgjedhur në maj në Qarkun e Vlorës, është fotografuar duke u karikuar në institucionin ku ai ka qenë drejtor, në Arkivin e Shtetit.

Ardit Bido ka qenë përfaqësues i PDIU-së, i cili u zgjodh drejtor i Përgjithshëm i Arkivave të Shqipërisë në vitin 2016 dhe së fundi është bërë deputet i PS-së në Qarkun e Vlorës.

CNA ka mundur të sigurojë foto nga oborri i Arkivit të Shtetit ku Ardit Bido karrikon mjetin e tij në institucionin ku ka qenë drejtor.

Fotot janë bërë së fundi, nuk po e përcaktojmë datën, sepse do ta sjellim në një shkrim tjetër, pas justifikimeve qesharake të ish-drejtorit, tani deputet.

CNA iu drejtua deputetit socialist dhe e pyeti, a ishte ky mjeti i tij dhe a kishte dijeni për rastin?

Në fakt, Bido u përgjigj se ai ndodhej në Strasburg kur mjeti ka qenë aty por më pas ndryshoi qëndrim. Këtë ne e konfirmojmë pasi ai ka qenë në një mbledhje të Asamblesë Parlamentare të Europës në Strasburg, por mjeti është fotografuar në oborrin e Arkivit të Shtetit ku ai ka qenë drejtor, kur BIdo ishte në Tiranë.

Pyetja është e thjeshtë: Si ka mundësi një ish-drejtor socialist, sot deputet, shkon dhe karikon makinën e tij elektrike në një institucion publik? Për çfarë? Për 5 mijë apo 10 mijë lekë të vjetra, që kushton karikimi i një makine, apo për të pasur luksin dhe për të siguruar karikim dhe parkim falas në oborrin e institucionit që ka drejtuar më parë?

Në fakt, kjo nuk është etike e as morale. Gjithsesi, ne në mënyrë profesionale iu drejtuam zotit Bido, i cili na tha:

“Po, ajo është makina ime, por nuk e kam pasur unë në përdorim, por një bashkëpunëtor i imi teksa unë kam qenë jashtë këto ditë, në Strasburg. Fakti që ka qenë aty tani po e marr vesh”.

CNA do të sjellë një material tjetër ku do të saktësojmë se kur është fotografuar mjeti, kur ka qenë zoti Bido këtu apo dikush tjetër e ka parkuar?

Kush e ka çuar mjetin, shoferi apo dikush tjetër kjo për ne ka pak rëndësi. Mjeti i deputetit socialist është fotografuar duke u karikuar në institucionin që ai ka drejtuar me paratë e shqiptarëve.

Bido megjithëse paguhet 3 apo 4 mijë euro në muaj, tashmë duhet të karikojë makinën në oborrin e ndërmarrjes që ai ka drejtuar.

Ndoshta i duket vetja ende drejtor apo për qoka drejtuesi aktual i institucionit lejon të hyjnë mjete dhe të karikohen.

Pse nuk shkon një qytetar i thjeshtë të karikojë atje makinën falas?

Që kur Arkivi i Shtetit ka filluar të japë karikim falas për makinat elektrike?

CNA do të sjellë të tjera materiale që do të tregojnë se ky është një skandal dhe zoti Bido nuk është i vetmi që shfrytëzon institucionet ku kanë punuar apo ofiqin, karriget që mbajnë si deputetë apo zyrtarë për interesa përfitimi personal./ CNA