web counter
LEXO PA REKLAMA!

SHKARKO APP

App Store
Google Play

Skandali me mbifaturimet që thelluan humbjet e “Air Albania”

5 Shtator 2025, 08:28, Denoncim CNA
Skandali me mbifaturimet që thelluan humbjet e “Air Albania”
Foto ilustruese

Në disa shkrime të njëpasnjëshme CNA ka sjellë materiale investigative që po përpiqen të ndriçojnë fatin e “Air Albania”-s dhe kush e çoi kompaninë në një gjendje të vështirë financiare. (Lexo Ketu)

Pas çështjes së bilanceve që nuk deklarohen në QKB, por dalin në media, CNA po sjell një tjetër problematikë.

Gjithçka ka dalë nga lajmet në media ku është raportuar sekuestrimi nga kompania IBN kundër “Air Albania” (sipas vendimit të Apelit Nr. 643 (30-2025-3979), datë 13.05.2025 – Juridiksioni i Përgjithshëm, dhe vendimit të Gjykatës së Lartë që rrëzoi këtë sekuestrim).

Ky vendim i fundit i Gjykatës së Lartë tregon ankesën e "Air Albania" për faturim të tepruar, e pranuar nga CEO, Sinan Dilek.

Ky mbifaturim është pjesë e humbjes së paraqitur në bilancin e deklaruar nga "Turkish Airlines" për “Air Albania”, material që u publikua edhe në media.

Mbifaturimi, i cili kap vlera miliona euro, përfaqëson pjesë të humbjes që kompania e kateringut IBN e kishte raportuar më parë.

Vendimi i Gjykatës së Lartë:

• Pezullimi i ekzekutimit të vendimit të Apelit deri në shqyrtimin e ankimit.

• Heqja e masës së sekuestrimit të vendosur mbi llogaritë bankare dhe kuotat e “Air Albania” sh.p.k. nga Zyra e Ekzekutorit Privat “QEVA” sh.p.k. (letrat 591/10, 591/11, 592/9, 592/10, 593/9, 597/6, datë 19.05.2025).

Por nga dokumentet e Gjykatës së Lartë rezulton se në vetëm një vit, 44,000 pasagjerë janë faturuar vetëm për biznes klas, pjesa e parë e avionit ku jepet edhe shërbim ekstra.

A mund të ketë 44 mijë pasagjerë biznes “Air Albania” në një vit? Me të tilla shifra kompania duhet të shkëlqente në të ardhura e jo të kishte të tilla humbje. Si është e mundur kjo?

Këto shifra që gjenden te dokumentet e vendimit të gjykatës flasin për një të vërtetë të dhimbshme që mund të shkojë në kufijtë e një skandali të madh.

Mjafton të bëjmë një llogari të thjeshtë. Një avion ka vetëm 8 ulëse klasë biznesi mesatarisht dhe që shpesh janë gjysmë bosh? (Jo të gjithë mund të udhëtojnë në klasën e biznesit).

Skandali me mbifaturimet që thelluan humbjet e “Air Albania”
Foto ilustruese

Me një matematikë të thjeshtë na tregon të vërtetën.

44 mijë pasagjerë biznes për një vit, i pjesëtojmë me 365 ditë, (me maksimum 2 avionë të “Air Albania” në flotë), del shifra 120 pasagjerë biznesi në ditë.

Duke marrë numrin e fluturimeve zyrtare që është gjatë një dite maksimumi del shifra se për çdo fluturim të “Air Albania” të kishte 20 pasagjerë VIP.

Çdo fluturim 20 pasagjerë biznesi, kjo shifër është dy herë e gjysmë më e madhe se kapaciteti i avionit prej 8 personash maksimalisht për çdo fluturim.

Pra, vendimi i gjykatës na tregon të vërtetën e humbjeve të “Air Albania”, që në thelb janë mbifaturime miliona e miliona euro.

A mund të ketë një arsye tjetër që Sinan Dilek, ish-CEO i “Air Albania”, nuk ka parë faktet, por mund të ketë falsifikuar shifrat në bashkëpunim me kompaninë që jepte shërbimin?

CNA do të thellojë më tej investigimin e saj me publikimin e pagesave të paligjshme jashtë autorizimit të CEO-s, mospërputhjen e llogarive të agjencive dhe përfitime të tjera.

Këto të gjitha janë një sirenë alarmi për aksionarët shqiptarë që duhet të kërkojnë të drejtat e tyre menjëherë.

Pas daljes së të vërtetës për mbifaturimet që kanë thelluar humbjet, të cilat i zbuloi njëherë e mirë Gjykata e Lartë./ CNA

 





Lajmet e fundit nga