Ngrohje me kursim, ndalim i reklamave elektronike/ Ja se si Europa po përgatitet për dimrin që po vjen

1 Shtator 2022, 20:51, Blog CNA

Ngrohje me kursim, ndalim i reklamave elektronike/ Ja se si Europa po

Foto ilustruese

Ministri gjerman i Financave, Christian Lindner, deklaroi për median vendase “Bild am Sonntag” se qeveria duhet ta trajtojë “me urgjencën më të madhe” problemin e rritjes së çmimeve të energjisë. Homologu i tij, Ministri i Ekonomisë, Robert Habeck, po kërkon liberalizimin e çmimit të energjisë elektrike dhe gazit.

Edhe kryeministrja franceze Elisabeth Borne është gati të vendosë një taksë mbi fitimet ekstra për të financuar subvencionet për zbutjen e efektit të kostove të rritura. Dhe sipas parashikimeve që bën shtypi francez, asambleja e industrialistëve do t’u kërkojë kompanive të ulin me 10 për qind konsumin e energjisë gjatë javëve të ardhshme.

Mbi 280 miliardë euro ndihmë për shtresat më në nevojë

Sipas një analize të institutit ekonomik “Bruegel”, vendet europiane kanë shpenzuar tashmë rreth 280 miliardë dollarë për ndihmën ndaj qytetarëve më të prekur nga kriza. Por problemi është se këto fonde janë veçse arna në një vrimë që po bëhet gjithnjë e më e madhe.

Në fakt masat mbështetëse janë gjithmonë disa hapa prapa rritjes së çmimeve.

Ekonomisti Sebastian Dullien, drejtor i qendrës kërkimore IMK, i cituar nga Bloomberg thotë se shkalla e vërtetë e problemit nuk është e qartë për qeverinë e kancelarit gjerman Scholz, ndërsa paralajmëron: "Gjermania po përballet me një tronditje makroekonomike gjigante”.

Ekonomisti Sebastian Dullien

Po sa e madhe është në fakt ajo? Një kosto shtesë për familjet, bizneset dhe shtetin prej 200 miliardë euro vetëm për vitin e ardhshëm, ose sa 5 për qind e Prodhimit të Brendshëm Bruto. Por nga ana tjetër edhe prirja rritëse e kostove nuk po tregon shenja ndalimi.

Në Itali, kostoja mesatare e energjisë e vendosur është rritur në 740 euro për Megavatorë, me një normë maksimale për orë prej 867.28 eurosh dhe minimale prej 688.24 eurosh. Ndërkohë në Gjermani e ka kapërcyer nivelin 1000 euro. Aktualisht sytë e të gjithëve janë kthyer tek Amsterdami, në tregun tashmë të famshëm dhe të kontestuar Ttf ku vendoset çmimi që “dikton” edhe faturat tona dhe që të premten ishte 239 euro për Megavatorë, nga vetëm 25 euro që ishte një vit më parë.

Rihapja e tregut është e qetë, por paqëndrueshmëria e tij mbetet e lartë. Edhe sepse këtë javë fillon edhe ndalimi i paralajmëruar i furnizimit me gaz të Evropës përmes “Nord Stream 1”, i paralajmëruar nga kompania ruse “Gazprom” me arsyetimin e procedurave të mirëmbajtjes. Pra ekzistojnë të gjithë elementet që situata të përshkallëzohet më tej.

Kundërmasat në Europë

Vendet europiane po i afrohen dimrit të ardhshëm duke hartuar dhe miratuar plane që përpiqen ta frenojnë konsumin, që nxisin ndryshime të vogla në zakonet e përditshme, përpara se të kalojnë në racionime edhe më serioze. Gjermania ka nisur tashmë të zbatojë një paketë masash për të reduktuar konsumin e energjisë elektrike.

Ngrohje me kursim, ndalim i reklamave elektronike/ Ja se si Europa po

Nga 1 shtatori, në godinat publike do të lejohet një temperaturë maksimale prej 19 gradësh për sistemet e ngrohjes. Ndërsa korridoret, hollet dhe zonat e tranzitit do të mbeten pa ngrohje. Termostati do të kufizohet deri në 12 gradë në ambientet ku punonjësit kryejnë punë fizike intensive.

“Ne nuk duam që të masim temperaturat në dhomat e gjumit. Liria individuale është e rëndësishme. Por masat që kemi marrë kërkojnë përgjegjësinë e familjeve për të kontribuar në uljen e konsumit të energjisë”- shpjegoi Ministri i Ekonomisë, Robert Habeck, që vjen nga Partia e Gjelbër.

Ndërsa senatori ambientalist Jens Kerstan paralajmëroi: “Në rast të mungesës së madhe të gazit, uji i nxehtë mund të jetë në dispozicion vetëm në periudha të caktuara të ditës”. Ndërkohë do të ndalohet ndriçimi i godinave publike natën. Edhe tabelat ndriçuese do të fiken nga ora 22:00 e mbrëmjes deri në orën 06:00 të mëngjesit. Kjo gjë po ndodh tashmë në disa komuna, si në Augsburg të Bavarisë. Që nga fundi i korrikut, godinat historike kanë fikur dritat natën, ndërsa ndriçimi në rrugë ka një intensitet më të ulët.

Edhe Franca, me moton “ka mbaruar epoka e bollëkut” e promovuar nga Emmanuel Macron, po përgatitet për një paketë të kursimit të energjisë. Parashikohet ndalimi i reklamave me drita midis orës 1 dhe 6 të mëngjesit, si dhe mbajtja mbyllur e dyerve gjatë zhvillimit të aktiviteteve tregtare me ngrohje apo me ajër të kondicionuar.

Sipas Agjencisë Transalpine të Mjedisit dhe Menaxhimit të Energjisë, një tabelë, elektronike reklamash konsumon po aq sa një familje mesatare për ndriçim dhe pajisje shtëpiake. Edhe pse është më pak e varur se të tjerët nga importet e gazit rus, në Spanjë disa masa për frenimin e konsumit të energjisë janë vendosur që nga fillimi i këtij muaji.

Ngrohje me kursim, ndalim i reklamave elektronike/ Ja se si Europa po

Kështu dritat në vitrinat e dyqaneve fiken në orën 10 të mbrëmjes. Dyert e dyqaneve duhet të mbahen të mbyllura, për të mos e zhbërë efektin e kondicionerit, që nuk duhet të gradohet më pak se 27 gradë gjatë verës. Ndërkohë në Portugalinë fqinje po zhvillohet një debat në lidhje me masat që duhen zbatuar.

CPP, një grupim i tregtarëve, ka ngritur hipotezën e një reduktimi të orarit të hapjes së dyqaneve, midis së dielës dhe së enjtes, me përjashtim të kinemave dhe restoranteve. Midis Lisbonës dhe Portos bizneset kanë orët më të gjata të qëndrimit hapur në Evropë. Shpeshherë ato rrinë të hapura deri në mesnatë.

Plani italian

Me pak fjalë, këto janë masa që shkojnë në drejtimin e përcaktuar nga Ministri i Tranzicionit Ekologjik, Roberto Cingolani, si plani i parë i reagimit ndaj krizës. Ulje me 1 gradë e temperaturës së kondicionerëve në shtëpi, zyrat publike, dhe reduktim me 1 orë i kohëzgjatjes për funksionimit të impianteve të ngrohjes dhe ftohjes. Pra duhet graduar maksimumi 19 gradë në dimër dhe jo më pak se 27 gradë në verë. Po ashtu kërkohet reduktimi i sezonit të ngrohjes duke shkurtuar një javë në fillim dhe një tjetër në fund të stinës së dimrit./ “La Repubblica” - Përkthyer dhe përshtatur nga CNA.al