web counter
LEXO PA REKLAMA!

SHKARKO APP

App Store
Google Play

E fundit!

x

Zgjerohet ndihma juridike falas, qeveria shton përfituesit

14 Korrik 2026, 14:50, Aktualitet CNA

Zgjerohet ndihma juridike falas, qeveria shton përfituesit

Skema e ndihmës juridike falas pritet të zgjerohet me kategori të reja përfituesish dhe me një paketë më të gjerë shpenzimesh të mbuluara nga buxheti i shtetit. Ndryshimet janë propozuar nga Ministria e Drejtësisë përmes një projektligji të ri, i cili synon të rrisë mundësinë e qytetarëve për të pasur akses në drejtësi.

Në listën e përfituesve të rinj parashikohen viktimat e terrorizmit, viktimat e krimit dhe familjarët e tyre, personat që kërkojnë njohjen e statusit të aftësisë së kufizuar, përfituesit e ndihmës ekonomike dhe pensionit social. Mbështetje do të ofrohet edhe për komunitetet rome dhe egjiptiane në çështjet që lidhen me dokumentacionin civil, si dhe për sinjalizuesit që raportojnë shkelje të legjislacionit europian.

Përveç zgjerimit të kategorive, ndryshimet sjellin edhe rritje të mbështetjes financiare. Shteti nuk do të kufizohet vetëm te mbulimi i tarifave gjyqësore, por do të përfshijë edhe shpenzime të tjera, si tarifat noteriale, kadastrale, pagesat për ekspertë dhe kosto të tjera që lidhen me zbatimin e vendimeve të gjykatave.

Sipas argumentimit të qeverisë, një pjesë e qytetarëve që kanë përfituar vendime gjyqësore në favor të tyre kanë hasur vështirësi për t’i zbatuar ato për shkak të shpenzimeve shtesë. Për këtë arsye, zgjerimi i mbulimit financiar shihet si një mënyrë për ta bërë më efektive ndihmën juridike.

Projektligji parashikon edhe thjeshtimin e procedurave të aplikimit. Për marrjen e ndihmës juridike parësore do të kërkohet vetëm dokumenti i identifikimit dhe një deklarim nga qytetari, ndërsa verifikime të tjera do të kryhen vetëm kur të ketë paqartësi mbi të dhënat e paraqitura.

Për rastet e viktimave të dhunës, të miturve dhe situatave urgjente do të vendoset një procedurë e posaçme për caktimin më të shpejtë të avokatit.

Ndërkohë, Drejtoria e Ndihmës Juridike Falas do të ketë kompetenca më të zgjeruara, duke përfshirë edhe të drejtën për të kundërshtuar në gjykatë vendime që vlerësohen si në kundërshtim me kriteret ligjore ose si abuzive.

Projektligji, pjesë e programit legjislativ të vitit 2026, synon të forcojë mbrojtjen ligjore për grupet në nevojë dhe të përshtatë më tej sistemin shqiptar me standardet e Bashkimit Europian./ CNA





Lajmet e fundit nga