VIDEO-Si Erion Veliaj dhe hajdutët “5D” gënjyen shqiptarët

30 Mars 2024, 17:16, Aktualitet CNA

VIDEO-Si Erion Veliaj dhe hajdutët “5D” gënjyen

Pasditen e sotme, drejtuesi politik i PD-së për Tiranën Belind Këlliçi ka publikuar një video të kryebashkiakut Erion Veliaj në emisionin e Blendi Fevziut, ku shprehej se denoncimi që kishte bërë Këlliçi ndaj Mariglen Qatos ishte një gënjeshtër dhe se për këtë ishte paditur në Prokurori.

Në fakt drejtorët e tij janë përfshirë në afera dhe ditën e enjte u arrestuan tre prej tyre, Mariglen Qato, Redian Molla dhe Taulant Tushe, të cilët kanë përfituar para nga tenderat e Bashkisë Tiranë.

Këtë e vërtetoi dhe SPAK-u, ku sqaroi se pronarët de fakto të kompanisë 5D janë Mariglen Qato dhe Redian Molla.

Pra, Erion Veliaj quajti një gënjeshtër të madhe faktin që një drejtor i bashkisë ka marrë miliona euro nga bashkia me tenderat ndërsa arrestimet e drejtorëve të tij tregojnë të kundërtën.

Hetimet e SPAK

Molla dhe Qato e kanë zotëruar këtë shoqëri tregtare në mënyrë indirekte, duke përdorur persona të tjerë, shtetasit E.M., M.P. dhe N.M., si ortakë fiktivë në aktet e regjistrimit dhe funksionimit të shoqërisë, me të cilët ortakët e vërtetë të shoqërisë kanë pasur lidhje shoqërore dhe lidhje miqësore.

Sipas SPAK-ut, gjatë periudhës 2016-2020, kur Redi Molla si Drejtori i Përgjithshëm i shoqërisë “Ujësjellës Kanalizime Tiranë”, shoqëria tregtare “Igor Elektrik” e njëjtë me “V.A.S Konstruksion”, njëjtë me “5D Konstruksion” sh.p.k., ka marrë pjesë dhe është shpallur fituese në shkelje të rregullave të prokurimit publik në 7 (shtatë) procedura prokurimi, të realizuara nga autoriteti kontraktor “Ujësjellës Kanalizime Tiranë” sh.a.

Në këto procedura Redi Molla ka pasur cilësinë e titullarit të autoritetit kontraktor, ka urdhëruar kryerjen e prokurimit, ka urdhëruar përbërjen e Njësisë së Prokurimit, ka urdhëruar përbërjen e Komisionit të Vlerësimit të Ofertave (duke caktuar në katër raste si anëtar të këtij komisioni Mariglen Qaton, që është ortaku tjetër indirekt i shoqërisë). Ndërkohë ka nënshkruar kontratat e sipërmarrjes, si dhe ka kryer çdo veprim tjetër që lidhet me cilësinë e titullarit të autoritetit kontraktor, me shoqërinë tregtare në zotërim të tij.

Po kështu, gjatë viteve 2016-2018, kur Mariglen Qato ka ushtruar funksionin e Drejtorit të Departamentit Mbështetës në shoqërinë “Ujësjellës Kanalizime Tiranë” subjekti tregtar i mësipërm ka marrë pjesë dhe ka fituar në kundërshtim me rregullat e prokurimit publik në 4 (katër) procedura prokurimi.

SPAK-u thekson se është provuar edhe me fakte se kompania “V.A.S Konstruksion” sh.p.k. e njëjtë me “5D Konstruksion” sh.p.k., ka marrë pjesë dhe është shpallur fituese në kundërshtim me rregullat e prokurimit publik, në disa procedura prokurimi të organizuara nga autoriteti kontraktor Bashkia Tiranë.

Pra, Erion Veliaj quajti një gënjeshtër të madhe faktin që një drejtor i bashkisë ka marrë miliona euro nga bashkia me tenderat ndërsa arrestimet e drejtorëve të tij tregon të kundërtën./CNA