web counter
LEXO PA REKLAMA!

SHKARKO APP

App Store
Google Play

E fundit!

x

Miliona euro 'fluturuan' te drejtorët e Veliajt, si i përdorën të afërmit e tyre

30 Mars 2024, 09:54, Aktualitet CNA

Miliona euro 'fluturuan' te drejtorët e Veliajt, si i

Drejtorët e Erion Veliajt ndryshuan 3 herë emrin e kompanisë ‘5D Construction’ përmes emrave të të afërmve dhe miqve të tyre në cilësinë e ortakëve. Miliona euro janë shifrat totale të transfertave në shkolla, kanalizime e gjelbërim-pastrim. Të dhënat nga celularët e sekuestruar, si dhe dosjet e prokurorimeve, fundosën disa drejtorë të Bashkisë së Tiranës si Mariglen Qaton, Redi Mollën e Taulant Tushën.

Sekuestrimi i disa celularëve të drejtorëve të Bashkisë së Tiranës siguroi provat më bindëse për Prokurorinë e Posaçme që të ngrinte akuzat ndaj tyre dhe të kërkonte 9 masa sigurie nga të cilat 3 arreste me burg e 6 detyrim paraqitje.

Mes komunikimeve janë evidentuar bisedat e Eglantina Zeres dhe Nestor Muhametllarit, teksa e para ka qenë në cilësinë e titullarit të autoritetit kontraktor "Tirana Parking". Kur faktet tregojnë se Mariglen Qato dhe Redi Molla, bashkëpunëtorët më të afërt të kryebashkiakut Erion Veliaj, ishin pronarët e vërtetë të shoqërisë ‘5D Construction’ sh.p.k., personat që u përdorën si ‘makijazh’ në cilësinë e drejtuesve ishin Eduard Meta, Muhamet Prifti dhe Nestor Muhametllari.

Ndaj asnjërit prej tyre nuk është caktuar ndonjë masë sigurie deri më tani, pavarësisht se kanë bërë veprime duke luajtur rolin e ortakëve fiktivë në aktet e regjistrimit dhe funksionimit të shoqërisë. 3 emrat e mësipërm rezultojnë lidhje e afërt shoqërore e familjare e drejtorëve Molla e Qato.

Të paktën 11 procedura të prokurimit me vlerë miliona euro janë evidentuar nga SPAK-u si të paligjshme, ndërsa burime konfirmojnë se janë duke u hetuar edhe 20 të tjera, ku shoqëria ‘5D Construction’ sh.p.k. përmes fshehjes pas emrave e kompanive të tjera fiktive, përfitoi miliona në projekte të ndryshme.

Por si lëvizën fijet dhe si u përdorën të tretët për të fshehur përfitimin e drejtorëve bashkiakë. Një nga personazhet është Eduart Meta. Në Qendrën Kombëtare të Biznesit rezulton administrator i shoqërisë "IGOR CONSTRUCTION" që më pas kthehet në ‘V.A.S Konstruksion’. Ajo është themeluar më 21/01/2016. Për 3 vite, kapitali i saj arrin të rritet me shifra të mëdha nga 100 mijë lekë, deri në 60.000.000 milionë lekë në 13 dhjetor të vitit 2013.

Me datë 27.12.2018, u ndryshua emri tregtar i shoqërisë nga ‘IGOR ELEKTRIK’ ne ‘V.A.S. Konstruksion'. Me datë 01.12.2021, u ndryshua emri tregtar i shoqërisë nga ‘V.A.S. Konstruksion' në ‘5D Konstruksion’. Përmes tenderëve në Ujësjellës Kanalizime e Gjelbërim-Pastrim, '5D construction’ që ka ndryshuar 3 herë emrat, ka përfituar sipas bilanceve në QKB rreth 6.7 miliardë lekë të vjetër nga buxheti.

Ekzaktësisht një vit pas themelimit të shoqërisë, Eduard Meta ia shet 75 për qind të aksioneve me një çmim të papërfillshëm shtetasit Muhamet Petriti, dhe dy vite pas themelimit, pra në 2018, nis edhe futja e duarve në paratë publike.

Tashmë kompania pas emrave të panjohur në botën e biznesit Muhamet Petriti dhe Nestor Muhametllari, evidentohet në disa projekte, mes tyre edhe kjo procedurë, ku fiton tenderin e rindërtimit të shkollës 9-vjeçare ‘Hasan Vogli’./Syri.net





Lajmet e fundit nga