web counter
LEXO PA REKLAMA!

SHKARKO APP

App Store
Google Play

E fundit!

x

"VOA": Korrupsion në Bashkinë e Tiranës, abuzime me tenderët

29 Mars 2024, 12:52, Aktualitet CNA
"VOA": Korrupsion në Bashkinë e Tiranës, abuzime me
Bashkia Tiranë

Në Shqipëri dy ish-drejtues në Bashkinë e Tiranës, Redi Molla, i cili ka qenë në krye të shoqërisë “Ujësjellës Kanalizime”, dhe Maringlen Qato, deri para disa kohësh në krye të Inspektoratit të Mbrojtjes së Territorit, u arrestuan sot me urdhër të Prokurorisë së Posaçme kundër Krimit të Organizuar dhe Korrupsionit. Ata dyshohen për “korrupsion pasiv” dhe “fshehje e mosdeklarim të pasurisë”.

Një urdhër i dytë arresti është lëshuar edhe për Taulant Tushën, ish-Drejtor i Përgjithshëm, i arrestuar më herët, për përfshirjen në rastin e inceneratorit të Tiranës. Ai dyshohet për “shkelje të barazisë në tenderë”.

Masa më të lehta, “Detyrim për paraqitje”, janë dhënë ndaj katër drejtuesve dhe ish-drejtuesve në bashki, Enton Punavija, Drejtor i Drejtorisë së Transportit, Julian Zanaj, Drejtor i Prokurimeve, Eglantina Zere e shoqërisë “Tirana Parking” dhe Deborah Keçi, titullare e Klubit Sportiv “Tirana”, ndaj një përgjegjësi sektori, si dhe ndaj administratorit të kompanisë “5D Konstruksion”, Nestor Muhametllari.

Është pikërisht kjo kompani, që ka ngritur dyshime e rreth së cilës janë zhvilluar hetimet e Prokurorisë së Posaçme. Sipas njoftimit zyrtar, “janë krijuar dyshime të arsyeshme se shtetasit Redi Molla dhe Maringlen Qato, janë ortakët e vërtetë dhe pronarët “de facto” të shoqërisë “5D Konstruksion” sh.p.k. Ata e kanë zotëruar këtë shoqëri tregtare në mënyrë indirekte, duke përdorur persona të tjerë, si ortakë fiktivë në aktet e regjistrimit dhe funksionimit të shoqërisë”.

Kompania, e cila ka ndryshuar disa herë dhe emër, rezulton të ketë përfituar “në kundërshtim me rregullat” një seri tenderësh nga agjencitë në varësi të Bashkisë së Tiranës, përfshirë 7 raste nga “Ujësjellës Kanalizime Tiranë”, kur ajo drejtohej pikërisht nga Redi Molla, ndërsa Maringlen Qato ishte anëtar i Komisionit të Vlerësimit të Ofertave.

Disa procedura të tjera prokurimi janë fituar direkt nga Bashkia e Tiranës. Në këtë rast, sipas Prokurorisë së Posaçme është zbuluar përfshirja e Drejtorit të Përgjithshëm Tusha, i cili dyshohet se së bashku me disa anëtarë të Komisionit të Vlerësimit të Ofertave “e kanë favorizuar dhe i kanë krijuar këtij subjekti tregtar avantazhe dhe privilegje të padrejta në raport me operatorët e tjerë ekonomikë që kanë marrë pjesë në procedurat e prokurimit, duke e shpallur fituese të procedurës së prokurimit në mënyrë të parregullt dhe në shkelje të rregullave të prokurimit publik. Ekzistojnë dyshime të bazuara se Tusha ka pasur dijeni në lidhje me ortakët e vërtetë të shoqërisë “5D Konstruksion” sh.p.k. dhe ka favorizuar këtë shoqëri tregtare duke ditur se cilët persona kanë qenë zotëruesit indirektë të aksioneve të shoqërisë”.

Dy rastet më flagrante janë procedurat e prokurimit nga shoqëria “Tirana Parking” dhe Klubi Sportiv "Tirana". Sipas Prokurorisë së Posaçme, titullaret e tyre ia kanë besuar vlerësimin e ofertave të pjesëmarrësve në tender, vetë punonjësve të shoqërisë “5D Konstruksion sh.p.k.”/VOA





Lajmet e fundit nga