web counter
LEXO PA REKLAMA!

SHKARKO APP

App Store
Google Play

E fundit!

x

Turi i 83-të Çiklistik i Shqipërisë 2026/ Ja akset që bllokohen për 5 ditë

15 Maj 2026, 17:03, Aktualitet CNA

Turi i 83-të Çiklistik i Shqipërisë 2026/ Ja akset që

Prej të hënës, disa nga akset kryesore rrugore dhe qytetet e vendit do të përfshihen nga kufizime të përkohshme të qarkullimit.

Shkak është bërë nisja e aktivitetit ndërkombëtar sportiv “Turi i 83-të Çiklistik i Shqipërisë 2026”, i cili do të zhvillohet në 5 etapa, nga data 18 deri më 22 maj.

Në këtë event marrin pjesë skuadra nga Shqipëria, Ballkani dhe Europa, çka ka detyruar Policinë e Shtetit të hartojë një plan të posaçëm masash për të garantuar sigurinë e çiklistëve dhe mbarëvajtjen e garës.

Bllokimet e akseve do të nisin çdo ditë në orën 12:00, me përjashtim të etapës së fundit që nis në orën 10:00. Policia u bën thirrje qytetarëve dhe drejtuesve të mjeteve të tregojnë mirëkuptim dhe të përdorin akset alternative, pasi kufizimet do të prekin pikat kyçe të qarkullimit kombëtar.

Në etapën e parë, e cila nis të hënën në orën 12:00, gara do të fillojë nga qendrat dhe rrugët kryesore të Tiranës, duke u zhvendosur më pas në aksin autostradal Tiranë–TEG–Thumanë–Milot–Rrëshen–Reps, me kthim në Milot dhe finish në Lezhë.

Të martën, po në orën 12:00, do të bllokohet tërësisht aksi rrugor Lezhë–Vorë–Golem–Rrogozhinë, me përfundim në qytetin e Elbasanit.

Eta pa e tretë, që do të zhvillohet të mërkurën, do të sjellë kufizime të forta në aksin Elbasan–Belsh–Kuçovë–Lushnjë–Unaza e Fierit, për t'u mbyllur më pas në Vlorë.

Ditën e enjte, qarkullimi do të paralizohet përkohësisht në aksin bregdetar dhe atë jugor Vlorë–Tuneli i Llogarasë–Himarë–Kuç–Lepincë–Kotë, për t'u rikthyer sërish me finish në Vlorë.

Gara ndërkombëtare mbyllet të premten, ku bllokimet do të nisin më herët, që në orën 10:00, në aksin Vlorë–Rrethrrotullimi i Lushnjës, ndërsa finishi i madh i xhiros do të jetë në qytetin e Fierit./CNA 





Lajmet e fundit nga