E fundit!

15:38 Aktualitet

Goditi protestuesin në Zvërnec/ Ndryshon masa e sigurisë për një nga punonjësit e sigurisë së kantierit

Gjykata e Apelit ka ndryshuar masën e sigurisë për një ng...

Të shtënat me armë në Lezhë/ Dëshmia e efektivit ngre dyshime, policia nuk gjen gëzhoja në vendngjarje

12 Dhjetor 2023, 11:00, Aktualitet CNA

Të shtënat me armë në Lezhë/ Dëshmia e efektivit

Foto ilustruese

Policia e Kurbinit ka dhënë detaje në lidhje me ngjarjen e djeshme ku pati të shtëna me armë zjarri. Sipas policisë, efektivi Dh.M., 23 vjeç, teksa po ikte për në punë, në vendin e quajtur "Rruga e Sanxhakut" ka parë dy persona të armatosur.

Sipas të riut, 2 personat e armatosur sapo kanë parë efektivin, kanë qëlluar me armë në ajër. Menjëherë, punonjësi i Policisë është kundërpërgjigjur, duke qëlluar nga brenda automjetit të tij, me armën e shërbimit.

Fatmirësisht nuk ka pasur persona të lënduar, por është dëmtuar makina e policisë nga vetë të shtënat e efektivit.

Në vendngjarje nuk konstatohen gëzhoja, gjurmë apo prova të tjera materiale që mund t’u përkasin shtetasve të kallëzuar nga punonjësi i Policisë.

Aktualisht po hetohet në dy pista, e para lidhet me dëshminë e punonjësit të policisë dhe e dyta, dyshohet për një inskenim të ngjarjes nga ana e efektivit.

Njoftimi i Policisë:

Rreth orës 21:00, të mbrëmjes së kaluar, punonjësi i Policisë, shtetasi Dh. M., 23 vjeç, banues në Laç, me detyrë inspektor i Patrullës së Përgjithshme të Komisariatit të Policisë Lezhë, ka kallëzuar se sapo ka dalë nga banesa, për në punë, me automjet privat, ka parë në rrugë, në vendin e quajtur "Rruga e Sanxhakut", 2 shtetas të armatosur, të cilët sipas dëshmisë së 23-vjeçarit, sapo e kanë parë atë, kanë qëlluar me armë zjarri, në ajër.

Në një situatë të tillë, punonjësi i Policisë është kundërpërgjigjur, duke qëlluar nga brenda automjetit të tij, me armën e shërbimit. Nga të shtënat nuk është dëmtuar asnjë shtetas.

Menjëherë pas njoftimit, shërbimet e Policisë kanë shkuar në vendngjarje, si dhe është ngritur një grup i posaçëm hetimor, i cili po punon intensivisht, në drejtimin e Prokurorisë së Lezhës, për të fiksuar çdo provë qe do të çojë në sqarimin e rrethanave dhe të mekanizmit të ngjarjes, si dhe në zbardhjen e së vërtetës mbi këtë rast.

Aktualisht, nga këqyrja e vendit të ngjarjes rezulton se është dëmtuar automjeti i punonjësit të Policisë, nga qitjet me armë zjarri të kryera nga vetë punonjësi, nga brenda automjetit. Në vendngjarje nuk konstatohen gëzhoja, gjurmë apo prova të tjera materiale që mund t’iu përkasin shtetasve të kallëzuar nga punonjësi i Policisë.

Me qëllim hetimin e plotë të rastit dhe sqarimin e rrethanave të tij, te grupi i posaçëm hetimor është përfshirë dhe struktura vendore e Agjencisë së Mbikëqyrjes Policore./CNA